QTJ poıyz bıletteri baǵasynyń ózgerý sebebin túsindirdi
ASTANA. KAZINFORM — Qazaqstanda poıyz bıletteriniń qymbattaýy ınflıatsııa deńgeıi men jyl saıynǵy ındeksatsııa tetigine baılanysty. Bul týraly Úkimettegi brıfıngte «Qazaqstan temir joly» ulttyq kompanııasynyń ókili málim etti.
«QTJ» basqarma tóraǵasynyń orynbasary Ánýar Ahmetjanovtyń aıtýynsha, bıyl poıyz bıletteriniń baǵasy 7 paıyzǵa ósken. Al ótken jylǵy ınflıatsııa 12 paıyzdan asqan.
— Bıyl 1 sáýirden bastap bılet baǵasyna 7 paıyzdyq ındeksatsııa júrgizildi. Ótken jylǵy ınflıatsııa 12 paıyzdan joǵary boldy. Demek, bul ósim ınflıatsııa qarqynyn tolyq ótep otyrǵan joq, — dedi ol.
QTJ ókilderi bılet baǵasy jyl ishinde ózgermeıtinin atap ótti. Tarıf maýsymǵa da, táýliktiń ýaqytyna da baılanysty ózgermeıdi. Baǵa tek Kólik mınıstrligimen kelisilgen tártip boıynsha jylyna bir ret ındeksatsııa arqyly jańartylady.
Sondaı-aq kompanııa ókilderi poıyz ben ushaq bıletterin tikeleı salystyrýǵa bolmaıtynyn aıtty. Sebebi áýe tasymalynda suranysqa qaraı ózgerip otyratyn ıkemdi baǵa júıesi qoldanylady.
— Áýe bıletteriniń quny suranys pen usynysqa qaraı qubylyp otyrady. Keı kezeńderde 70–100 myń teńgege deıin jetýi múmkin. Al temirjol bıletteri jyl boıy bir deńgeıde saqtalady, — dedi Ánýar Ahmetjanov.
QTJ málimetinshe, áýe tasymalyndaǵy ıkemdi tarıf júıesi temirjol salasynda qoldanylmaıdy, sondyqtan poıyz bıletteriniń baǵasy turaqty sıpatqa ıe.
Buǵan deıin Premer-mınıstr jyl sońyna deıin jańa vagondardy jetkizýdi tapsyrǵan edi.
