QTJ Pavlodar fılıalynyń qyzmetkerleri para alǵany úshin 7 jylǵa sottaldy

PAVLODAR. KAZINFORM - Pavlodarda magıstraldyq jeliniń Pavlodar bólimshesiniń eki qyzmetkerine qatysty sot úkimi shyqty. Tergeý málimetine súıensek, olar merdigerden aqsha bopsalaǵan.

Qylmystyq is Pavlodar qalasynyń qylmystyq ister jónindegi aýdanaralyq sotynda qaraldy. 2025 jyldyń aqpan-sáýir aılary aralyǵynda magıstraldyq jeli bólimshesiniń basshysy men elektrmen jabdyqtaý qashyqtyǵynyń basshysy bopsalaý jolymen 2,7 mıllıon teńge para alǵany anyqtaldy. Jeke kásiporyn Aqsý-1 stantsııasynda elektr montajdaý jumystarymen aınalysqan.

- Sottalýshylardyń kinási kýágerlerdiń aıǵaqtarymen, sot saraptamalarynyń qorytyndysymen jáne sotta zerttelgen basqa da dáleldemelermen rastalady. Sot úkimimen bólim basshysy Qylmystyq kodekstiń 1,2,4-tarmaǵynyń 366-baby 3-bóligi boıynsha, qashyqtyq basshysy Qylmystyq kodekstiń 1,2-tarmaǵynyń 366-baby 3-bóligi boıynsha kináli dep tanyldy jáne árqaısysyna 7 jyl merzimge bas bostandyǵynan aıyrý jazasy taǵaıyndaldy. Sottalýshylardyń múlki tárkilenbeıdi, biraq memlekettik qyzmette qyzmet etý quqyǵynan ómir boıyna aıyryldy, - dep habarlady sottan.

Aıta ketý kerek, bólimshe basshysyna 2021 jylǵy derek boıynsha da aıyp taǵylǵan. Ol qaramaǵyndaǵy qyzmetkerden quny 57 myń teńge turatyn kreslo alǵany anyqtaldy.

Buǵan deıin Túrkistan oblysynda ákesin uryp-soǵyp, azaptaǵan er adamnyń sottalǵanyn jazǵanbyz.