QTJ oryndardy zańsyz satyp, poıyzda temeki shekken jolserikterdi jumystan shyǵardy

ASTANA. KAZINFORM – «Qazaqstan temir joly» kompanııasy Almaty-2 vokzalynda júrgizilgen ishki tergeý qorytyndysy boıynsha eki jolserikti jumystan bosatty, dep habarlaıdy kompanııanyń baspasóz qyzmeti.

Baspasóz qyzmetiniń málimetterine qaraǵanda, qazirgi tańda júıeli jumystar júrgizilip jatyr. Olar: BAQ jáne qoǵam ókilderiniń qatysýymen turaqty túrde ishki tekserý, tergeý jumystary júrgizilip turady. 

- Tekserý jumystarynyń qorytyndysy boıynsha Almaty-2 vokzalynda múmkindigi shekteýli jandarǵa arnalǵan oryndardy zańsyz satý jáne poıyz tambýrynda temeki shegý sııaqty áreketter anyqtaldy. Іshki tergeý qorytyndysy boıynsha zań buzǵan jolserikter jumystan bosatylyp, poıyz basshysyna qatań eskertý jarııalandy,- delingen «QTJ» kompanııasynyń baspasóz qyzmeti taratqan aqparatta. 

Mundaı tekserýler kompanııaǵa tıesili barlyq poıyzdarda júrgiziledi, dep eskertti kompanııa ókilderi.

Osyǵan deıin ulttyq tasymaldaýshy balalardy poıyzda tasymaldaý erejelerin eske salǵan bolatyn.