«QTJ» oqýǵa jumsalatyn shyǵyndar esebinen 342 mıllıon teńge únemdedi

ASTANA. QazAqparat - 2015 jyly «Qazaqstan temir joly» UK» AQ-nyń 6 myńnan astam jumysshysy ónerkásip qaýipsizdigi men eńbekti qorǵaý salasy boıynsha oqý tájirıbesinen ótti, dep habarlady kompanııanyń baspasóz qyzmetinen.

Temirjolshylar Aqtóbe, Pavlodar, Qaraǵandy, Taraz qalalaryndaǵy oqý ortalyqtarynda biliktilikterin jetildirdi. Osy sharanyń nátıjesinde, basqa oqý oryndaryna barýǵa, oqýǵa jumsalatyn shyǵyndar esebinen 342 mıllıon teńge únemdeldi.
«QTJ» UK» AQ fılıaly «Temir jol kóligindegi personaldy baǵalaý jáne damytý ortalyǵynyń» dırektory Maral Marasılovtyń aıtýynsha, atalǵan oqý oryndary quzyrly organdardan ónerkásip qaýipsizdigi men eńbekti qorǵaý boıynsha bilim berýge kelisimder alǵan.
Onyń aıtýynsha, «Kyrgyz temyr joly» MK, «Jol arna» JShS eńbekkerlerin oqytýǵa kelisimder jasalǵan. Jyl aıaǵyna deıin Aqtóbe ferroqorytpa zaýyty, «Jol jóndeýshi» JShS, «Aral tuz» JShS men basqa da mekemelerdiń eńbekkerleri oqý kýrstarynan ótedi.
Taıaýda temirjolshylar osy oqý oryndarynda qanatqaqty jobalar negizinde ónerkásiptik qaýipsizdik boıynsha on saǵattyq dıstantsııalyq oqýlarmen qamtylatyn bolady.