QTJ-nyń balalardy qoldaýǵa arnalǵan áleýmettik bastamalary qandaı
ASTANA. KAZINFORM – «Qazaqstan temir joly» UK» AQ balalardy qoldaýǵa baǵyttalǵan áleýmettik saıasatty júıeli túrde júzege asyryp keledi. Bul jóninde kompanııanyń apparat basshysy Erlan Amandyqov Úkimet otyrysynan keıingi baspasóz konferentsııasynda málimdedi.
Onyń sózinshe, QTJ áleýmettik jaýapkershiligi sheńberinde bıyldyń ózinde birneshe aýqymdy jobany iske asyryp jatyr.
– Jarkent qalasynda mektepke deıingi bilimniń qoljetimdiligin arttyrý maqsatynda bıyl 140 oryndyq balabaqsha qurylysy bastaldy. Sonymen qatar, Wabtec kompanııasymen yntymaqtastyq aıasynda Sekseýil jáne Shalqar eldi mekenderinde óner mektebi shyǵarmashylyq ortalyǵynyń qurylysy júrip jatyr. Tamyz aıynda iske qosamyz, – dedi Erlan Amandyqov.
Onyń aıtýynsha, Astanada Qazaqstan temir jolynyń tarıhy týraly «Jibek jolynan bastap bolat magıstraldarǵa deıin» mýzeıi ashyldy.
– Sonymen birge, Astana qalasynda padel alańy bar muz aıdyny qurylysy aıaqtaldy. Jaqynda iske qosylady, – dedi QTJ apparat basshysy.
Kompanııanyń bul baǵyttaǵy qyzmeti temirjolshylar otbasylarynyń balalaryn ǵana emes, temirjol salasyna qyzyǵýshylyq tanytatyn óńirlerdegi jasóspirimderdi de qamtıdy. Kópbalaly otbasylarǵa erekshe kóńil bólinedi.
Respýblıkalyq jáne halyqaralyq jarystardyń jeńimpazdary robototehnıka, ǵylym jáne sport salalaryndaǵy qabiletin damytýǵa arnalǵan paıdaly syılyqtarmen marapattalady. Kompanııa balalardyń shyǵarmashylyq jáne tanymdyq áleýetin arttyrý maqsatynda turaqty túrde aýqymdy (mysaly, 6-13 jas aralyǵyndaǵy balalarǵa arnalǵan «Temirjol balalardyń kózimen») baıqaýlar uıymdastyrady. Qatysýshylar temirjoldaǵy qaýipsizdik, bolashaq poıyzdar jáne urpaqtar sabaqtastyǵy taqyryptarynda esse jazyp, beınerolıkter ázirleıdi. Úzdik jumystardyń avtorlaryna qabilet-qarym men zeıindi damytatyn LEGO jıyntyqtary tabystalady.
Al jas temirjol áýesqoılary úshin lokomotıv depolaryna ekskýrsııalar uıymdastyrylyp, poıyz mashınısteriniń kabınalarynda mamandyqpen tanystyrý saparlary ótkiziledi.
Temirjolshylar otbasylaryna turaqty qoldaý kórsetý sharalary Ujymdyq shartta bekitilgen. Atap aıtqanda, 14 jasqa deıingi balalary bar jalǵyzbasty ata-analarǵa 6 AEK kóleminde materıaldyq kómek tólenedi. Odan bólek, mektep bitirýshi túlekterdiń ata-analaryna 25 mamyr kúni aqyly demalys kúni beriledi.
Aıta keteıik, buǵan deıin temirjol mashına jasaý óndirisi 22,5 paıyzǵa óskenin jazǵanbyz.
