QTJ moınyndaǵy 4,3 trln teńge qaryzdyń 52%-y shetel valıýtasymen alynǵan
ASTANA. KAZINFORM — «Qazaqstan temir joly» ulttyq kompanııasynyń qarjy jónindegi basqarýshy dırektory Daıyr Kósherov kásiporynnyń qaryz qurylymy týraly málimet berdi.
— Borysh júktememiz normatıv deńgeıinde. Qaryzdyń EBITDA-ǵa qatynasy jyl aıaǵynda 3,7 boldy. Álemdegi biz sııaqty ınfraqurylym men jolaýshylar tasymalyn qatar alyp otyrǵan halyqaralyq temirjol kompanııalarymen salystyrsaq, bul koeffıtsent 4-8 paıyz arasynda qubylady. Sonda biz normatıv deńgeıindemiz. Bul — bir. Ekinshiden qaryz júktememiz qalypty ekenin halyqaralyq reıtıngter de rastap tur. Sońǵy ret eýrobondty baǵasy boıynsha «Báıterektiń» deńgeıinde shyǵardyq, — dedi ol «Samuryq-Qazyna» qorynyń qoǵamdyq keńes otyrysynda.
Aıtýynsha, qaryzdyń jartysynan kóbi shetel valıýtasynda. Sonyń áserinen devalvatsııa kezinde ulttyq kompanııanyń qaryz júktemesi kúrt artyp ketedi.
— Qazir bizdegi qaryzdyń quny 4,3 trln teńge. Onyń 48 paıyzy teńgemen, 52 paıyzy shetel valıýtasymen alynǵan, — dedi basqarýshy dırektor.
Buǵan deıin Senattaǵy Úkimet saǵatynda kompanııa tóraǵasynyń orynbasary Erlan Qoıshybaev QTJ-nyń nomınaldy qaryzy 4,7 trln teńge bolǵanyn aıtqan.
Aıta keteıik, elimizde temirjolshylarǵa alǵashqy jarnasyz 4 paıyzdyq ıpoteka beriledi.
