QTJ men QazaqGaz kompanııalary qashan IPO-ǵa shyǵarylady
ASTANA. KAZINFORM – QTJ IPO-ǵa shyǵýǵa daıyndalyp jatyr, al «QazaqGaz» ázirge daıyn emes. Onyń IPO-ǵa shyǵý merzimi 2027-2028 jyldarǵa aýysýy múmkin. Bul týraly Kazinform agenttigi joldaǵan saýalǵa «Samuryq-Qazyna» AQ-nyń resmı jaýabynda aıtylǵan.

— QR Úkimetiniń 2020 jylǵy 29 jeltoqsandaǵy №908 qaýlysyna (Jekeshelendirýdiń keshendi jospary) sáıkes, «Qazaqstan temir joly» UK» AQ (QTJ) jáne «QazaqGaz» UK» AQ IPO ótkizý arqyly básekelestik ortaǵa berilýi tıis. QTJ, kez kelgen basqa aktıv sııaqty, IPO qarsańynda onyń ınvestıtsııalyq tartymdylyǵyn arttyrý úshin satýǵa deıingi daıyndyqty qajet etedi. Osyǵan baılanysty Qor kompanııamen birlesip jáne QR Úkimetiniń kelisimimen tıisti jumystardy júrgizip jatyr. QTJ IPO-synyń naqty merzimi men qurylymy satýǵa deıingi daıyndyq sharalarynyń aıaqtalýyna qaraı, ınvestıtsııalyq bankter sııaqty táýelsiz keńesshilerdiń usynystaryn eskere otyryp, sondaı-aq naryq boıynsha qolaıly jaǵdaı bolǵanda aıqyndalady, - delingen habarlamada.
Sondaı-aq qor málimdemesinde «QazaqGaz» kompanııasynyń IPO-ǵa shyǵýy birneshe jylǵa shegerilýi múmkin ekeni jazylǵan.
— QazaqGaz IPO-syn ótkizýge ázirge erte dep sanaımyz, óıtkeni kompanııanyń qazirgi jáne boljamdy qarjy ári operatsııalyq kórsetkishteri IPO sátti ótýi úshin ınvestıtsııalyq tartymdy aktıvtiń talaptaryna tolyqtaı saı emes. Qor men QazaqGaz QR Úkimetimen ózara birlesip osy baǵytta jumystardy júrgizip jatyr. QazaqGaz IPO-syn ótkizý merzimin kompanııanyń qarjylyq jaǵdaıynyń jaqsarýyna qaraı 2027-2028 jyldarǵa aýystyrý qajet dep sanaımyz, - delingen jaýapta.
Aıta keteıik, ótken jyly «Samuryq-Qazyna» AQ damý jáne jekeshelendirý jónindegi basqarýshy dırektory Saltanat Sátjan «Qazaqstan temir joly» men «QazaqGaz» IPO-ǵa bıyl shyǵarylady degen bolatyn.