QTJ men onyń enshiles kompanııalaryna zań buzýǵa qatysty 19 uıǵarym shyǵaryldy - Agenttik
Básekelestikti qorǵaý jáne damytý agenttigi 2022 jyly júzege asyrylatyn qyzmet túrlerin qurý, keńeıtý jáne (nemese) ózgertý kezinde monopolııaǵa qarsy organnyń kelisimin alý mánine «Qazaqstan temir joly» Ulttyq kompanııasy» AQ kompanııalar tobynyń qyzmetine monıtorıng júrgizdi.
Monıtorıng aıasyna 42 uıymnyń 424 qyzmeti tekserildi. Aıta ketsek, 42 kompanııanyń 14-i monıtorıngpen qamtylmaǵan, onyń ishinde: 7 – Qazaqstan Respýblıkasynyń rezıdenti emes, 7 – aktsııalardyń (qatysý úlesteriniń) 50%-dan aspaıtyn úlesi bar birlesken kásiporyn.
Osylaısha, taldanǵan 424 qyzmet túriniń 81-i Agenttiktiń kelisiminsiz júzege asyrylyp kelgeni anyqtaldy.
Agenttik QTJ jáne onyń uıymdas kompanııalaryna básekelestikti qorǵaý salasyndaǵy zańnama normalaryn buzýdy toqtatý týraly 19 uıǵarym shyǵardy.
Atap aıtqanda, QTJ, «Kedentransservıs» AQ, «Áskerılendirilgen temirjol kúzeti» JShS, «Qazaqstannyń kólik holdıngi» JShS, «KTZ Express» AQ, «KTZ EXPRESS SHIPPING» JShS, «Temirjolsý» AQ, «QTJ-Júk tasymaly» JShS, «QTJ-Jolaýshylar lokomotıvteri» JShS, «Port Quryq» JShS kelisilmegen qyzmet túrlerin júzege asyrýdy toqtatý nemese olardy belgilengen tártippen kelisý týraly uıǵarym shyǵaryldy.
Osyndaı monıtorıng aımaqtardaǵy áleýmettik salanyń 251 memlekettik kásipornynda da júrgizildi. Monıtorıng aıasynda 59 sýbektiniń is-áreketterinde zań buzýshylyqtar bary anyqtaldy jáne olardy toqtatý týraly uıǵarymdar joldandy.
2023 jylǵa arnalǵan josparlarǵa sáıkes mundaı jumys «Samuryq-Qazyna» AQ-ǵa kiretin jekelegen kásiporyndar boıynsha da jalǵasady, olardyń ishinde: «Qazaqtelekom» AQ, «Qazposhta» AQ, «Samuryq-Qazyna Kelisimshart» JShS, «Samuryq Qazyna Bıznes Servıs» JShS, «Samuryq Qazyna Invest» JShS, «Qazaqstandyq atom elektr stantsııalary» JShS.
2022 jyly memlekettiń kásipkerlikke negizsiz qatysýyn qysqartý jónindegi kezekti shara retinde Básekelestikti qorǵaý jáne damytý agenttigine kvazımemlekettik kásiporyndardyń monıtorıngi boıynsha quzyret berilgen bolatyn. Monıtorıng júzege asyrylatyn qyzmet túrlerin qurý, keńeıtý jáne (nemese) ózgertý kezinde monopolııaǵa qarsy organnyń kelisimin alý turǵysynan kvazımemlekettik kompanııalar qyzmetiniń júzege asyrylatyn túrlerin salystyrýdy bildiredi.
