QTJ qurylysy 11 jyldan beri bitpeı turǵan keshendi satpaıtyn boldy

AQTÓBE. KAZINFORM — «Tulpar-Talgo» vagondaryna qyzmet kórsetý kesheni endi «Talgo-Aqtóbe» tehnıkalyq qyzmet kórsetý pýnkti bolyp ózgeredi. QTJ baspasóz qyzmeti nysandy qaıta jobalap, qurylys 2026-2027 jyldary aıaqtalatynyn habarlady.

Aqtóbe qalasynyń temirjol vokzaly men 11-shaǵyn aýdany arasynda ornalasqan alyp qurylys alańy 11 jyldan beri bos tur. QTJ jeltoqsan aıynyń basynda bul nysandy satýǵa shyǵaratynyn málimdegen bolatyn. Alaıda arada taǵy birer apta ótkende dál osy keshende jańa jobany iske asyratynyn habarlady.

— Magıstraldyq jeli dırektsııasy aıaqtalmaǵan qurylys obektisin «Talgo-Aqtóbe» tehnıkalyq qyzmet kórsetý pýnkti etip qaıta jańǵyrtý máselesin qarastyryp jatyr. Ári «QTJ» UK» AQ-nyń Aqtóbe mashınalandyrylǵan jol qashyqtyǵy fılıaly quryldy. Aqtóbe mashınalandyrylǵan jol qashyqtyǵy fılıaly jobanyń nysanaly maqsatyn ózgertýdi kózdeıdi. Jobalaý-smetalyq qujattamany túzetý jáne qurylys-montajdaý jumystary shamamen 2026-2027 jyldary aıaqtalady, — dep habarlady QTJ baspasóz qyzmeti.

Aqtóbedegi «Tulpar-Talgo» vagondaryna qyzmet kórsetý kesheniniń qurylysyna áý basta 4,3 mlrd teńge qarastyrylǵan. Alaıda qarjy bolmaı, qurylys 2016 jyly toqtap qalǵan.

— Jobany basqa qalaǵa kóshirý týraly sheshim qabyldanbady, josparlaý jáne jobalaý kezeńderinde buzýshylyqtar men qateler anyqtalǵan joq. Osyǵan baılanysty naqty bir laýazymdy tulǵalardy jaýapqa tartýǵa esh negiz joq, — dep jazylǵan jaýapta.

Eske salsaq, «Tulpar-Talgo» vagondaryna qyzmet kórsetý kesheniniń qurylysy 2014 jyly bastalyp, toqtap qalǵan. Qazir qur qańqasy tur. Kazinform tilshisi «Qazaqstan temir joly» UK» AQ-na saýal joldap, jaýap aldy. Alǵashqy jaýapty ulttyq kompanııa bul qurylys nysany satýǵa shyǵarylatynyn aıtty. Ári merdiger sharttyq mindettemelerdiń tıisti deńgeıde oryndamaǵanyn, 2017 jyldyń 13 qyrkúıeginde kelisimshart birjaqty tártippen buzylǵanyn da habarlady.