QTJ qurylysy 11 jyl boıy bitpeı turǵan keshendi satýǵa shyǵarady
AQTÓBE. KAZINFORM — «Tulpar-Talgo» vagondaryna qyzmet kórsetý kesheniniń qurylysy 2014 jyly bastalyp, toqtap qalǵan. Qazir qur qańqasy tur. Kazinform tilshisi «Qazaqstan temir joly» UK» AQ-na saýal joldady.
Aqtóbe qalasyndaǵy 11 shaǵynaýdan men temirjol vokzalyna deıingi aralyqta alyp temir konstrýktsııa bar. Qabyrǵasy turǵyzylyp, tóbesi jabylǵan qurylystyń dál osy kúıde turǵanyna 10 jyldan asty.
Bir jaǵynda — temirjol, ekinshi jaǵynda — úıler. Bul jer jastardyń jıi keletinin ornyna aınalǵan.
Sebebi qurylys ishindegi jazýlardan ártúrli qoltańbany kórýge bolady. Taǵy biri bul mańdy kólik turaǵyna aınaldyryp alǵan.
Aqtóbe oblystyq jolaýshylar kóligi jáne avtomobıl joldary basqarmasynyń habarlaýynsha, «Qazaqstan temir joly» ulttyq kompanııasy 2012 jyly Aqtóbe stansasynan «Tulpar-Talgo» vagondaryna tehnıkalyq qyzmet kórsetý beketin salýdy josparlaıdy.
Sóıtip 2014 jyly «Qulager» QK» JShS keshenniń qurylys jumystaryn bastaıdy. Kóp uzamaı dál osyndaı keshendi Astana qalasynan bastap, Aqtóbedegi qurylys sol kúıi toqtap qalady.
— Joba bastamashysy — QTJ «Magıstraldyq jeli dırektsııasy» fılıaly. 2014 jyly «Qulager QK» JShS bas merdiger bolyp, qurylys-montajdaý jumystaryna kirisken. Sharttyq mindettemelerdiń tıisti deńgeıde oryndalmaýyna baılanysty shart 2017 jyldyń 13 qyrkúıeginde birjaqty tártippen buzyldy. Qarjylandyrýdyń bolmaýyna baılanysty jumys 2016 jyly toqtatyldy. Ońaltý rásimin júrgizýge baılanysty «Qulager» QK» JShS-niń obektini konservatsııalaýy toqtatyldy, sot organynyń tıisti sheshimi bar. 2026 jylǵa arnalǵan paıdalaný shyǵystary josparynda aıaqtalmaǵan qurylys obektilerin kúzetý jónindegi qyzmetter kózdelgen. Gosreestr.kz. portalynda elektrondy saýda-sattyq arqyly aıaqtalmaǵan qurylys obektisin ótkizý máselesi qaralyp jatyr, — dep habarlady QTJ baspasóz qyzmeti.
Aıta keteıik, budan ózge Aqtóbede qurylysy uzaqqa sozylǵan nysandar arasynda mektep, mektep-balabaqsha, sport keshenderi men emdeý orny bar.
Al kópqabatty úıler máselesi 2017-2018 jyldardan beri jalǵasyp keledi.
