«QTJ» kompanııasynda jemqorlyq áreketteri qalaı júzege asyrylyp kelgeni málim boldy
Bul týraly QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap habarlaıdy.
Olar vagondardy berý kezindegi ákimshilik kedergilermen jáne jemqorlyq shemalarymen, tıisti tsıfrlandyrýdyń bolmaýymen, temirjolshylardyń kásipkerlermen tikeleı baılanysymen, qaǵaz nysanda ótinimder berýmen jáne t.b. baılanysty bolǵan.
Anyqtalǵan jemqorlyq táýekelderin qylmystyq statıstıka da rastady.
Máselen, sońǵy 5 jylda QTJ laýazymdy tulǵalary men onyń vedomstvolyq baǵynysty uıymdaryna qatysty 136 qylmystyq is tirkelgen. Olar boıynsha 52 adam sottaldy. Bul saladaǵy qylmystardyń kópshiligi paraqorlyq (70%) jáne urlyq (13%) faktilerine baılanysty.
Negizinen qylmystar oryndalǵan jumystardyń aktilerine qol qoıý kezinde zańsyz syıaqy alýmen, jumysqa qabyldaýmen jáne qyzmet boıynsha aýysýmen, sondaı-aq júkterdi tasymaldaý úshin vagondar men teplovozdardy jedeldetip jáne kedergisiz berýmen baılanysty.
Agenttik tóraǵasynyń birinshi orynbasary Dmıtrıı Malahov óz sózinde júrgizilgen taldaýǵa sáıkes QTJ jekelegen bólimshelerinde vagondarmen aıla-sharǵy jasaý boıynsha jemqorlyq shemalary qurylǵanyn atap ótti.
Jasandy kedergiler men olardy bólýdiń jasyryn protsedýrasyna baılanysty kásipkerler óz máselelerin aqsha úshin beıresmı túrde sheshýge májbúr.
«Іs júzinde para bergen adam óz júkterin ýaqtyly jiberedi. Buǵan kásipkerlerdiń naqty dálelderi bar jáne ony qylmystyq isterdiń naqty materıaldarymen de rastalǵan. Jaqynda ǵana Qostanaı oblysy boıynsha QTJ bólimshesiniń basshylary sottaldy, olar zańsyz syıaqy úshin vagondar berý jónindegi qylmystyq shemany uıymdastyrǵan», - dep atap ótti D.Malahov.
Máselen, «Qaztemirtrans» Qostanaı fılıalynyń burynǵy basshysy Ýsabekovke qatysty qylmystyq is boıynsha oǵan vagondardy berý nemese bas tartý máselesin óz betinshe sheshýge múmkindik bergen jasyryn protsester anyqtaldy.
Ýsabekov lobbızm jasaǵan kásipkerler táýlik boıy óz vagondaryn tapshylyq kezeńinde de aldy, al basqalary óz kezegin birneshe apta kútýge májbúr boldy.
B. Ýsabekov jasaǵan qylmystary úshin 6 jylǵa bas bostandyǵynan aıyryldy, al para berýshi fırmaǵa 24 mln teńge kóleminde aıyppul salyndy.
Keńes qorytyndysy boıynsha Malahov aıtylǵan usynymdar Sybaılas jemqorlyqqa qarsy qyzmettiń qatań baqylaýynda bolatynyn atap ótip, QTJ-ny osy máselelerdi dereý sheshýge shaqyrdy.
