QTJ qomaqty qaryzyn jabý úshin tarıfti ózgertpek
ASTANA. KAZINFORM – «Qazaqstan temir joly» UK» AQ 2024–2026 jyldar aralyǵynda temirjol júk tasymaly tarıfterin jyl saıyn 24 paıyzǵa kóterý arqyly qaryzyn óteýdi josparlap otyr. Bul týraly «Samuryq-Qazyna» qorynan málim boldy.
2024 jyldyń 31 jeltoqsanyndaǵy jaǵdaı boıynsha «QTJ» UK» AQ qaryzy 2,9 trln teńgeni qurady.
Qordyń habarlaýynsha, qaryz qarajaty birqatar ınfraqurylymdyq jobany júzege asyrýǵa, sonyń ishinde «Dostyq-Moıynty» temir jolynyń ekinshi jolyn salýǵa, sondaı-aq jolaýshylar vagondaryn (Stadler, TVZ), Alstom elektrovozdary men Wabtec teplovozdaryn satyp alý arqyly jyljymaly quram parkin jańartýǵa tartyldy.
«QTJ» kompanııasynyń qazirgi qaryzy myna qadamdar arqyly ótelmek:
- 2024–2026 jyldar aralyǵynda temirjol júk kóliginiń retteletin tarıfterin jylyna 24 paıyzǵa arttyrý. Qazaqstan Respýblıkasynyń ekonomıkasyn jańǵyrtý jónindegi memlekettik komıssııadan tıisti oń sheshim alyndy;
- tranzıttik tasymaldaýdan túsetin kiristi arttyrý.
«QTJ» UK» AQ úshin tranzıttik tasymaldaý negizgi ósý baǵyty retinde qarastyrylyp otyr. Olardyń kólemin aldaǵy jyldary jańa ınvestıtsııalyq jobalardy (jyljymaly quramdy jańartý, ınfraqurylymdy salý jáne jańǵyrtý, termınaldar jelisin damytý jáne basqa da sharalar) iske asyrý esebinen ulǵaıtý josparlanǵan.
Byltyr jeltoqsan aıynda Kólik mınıstri Marat Qarabaev Qazaqstanda lokomıtıvterdiń tozý deńgeıi 61 paıyzdy quraǵanyn aıtty.