QTJ IPO-ǵa qashan shyǵarylady
ASTANA. KAZINFORM — QTJ 2026 aıaǵyna deıin IPO-ǵa shyǵýdy josparlap otyr. Bul týraly kompanııanyń basqarma tóraǵasy Talǵat Aldybergenov málim etti.
Onyń aıtýynsha, búginde kompanııa «Samuryq-Qazyna» qorymen birlesip belsendi daıyndyq jumystaryn júrgizip jatyr.
— IPO halyqaralyq platformalarda úsh lıstıngili formatta ótedi dep qarastyrylǵan, ıaǵnı London, Gonkong jáne Qazaqstan bırjasy eskerilgen. Merzimi - 2026 jyldyń sońyna deıin, — dedi Talǵat Aldybergenov Úkimet otyrysynan keıingi brıfıngide.
Aldyn ala jospar boıynsha kompanııanyń 25% aktsııasyn ornalastyrý josparlanǵan.
Eske salsaq, bıyl mamyr aıynda «Samuryq-Qazyna» qorynyń Korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov «Qazaqstan temir joly» ulttyq kompanııasynyń úsh lıstıngili IPO-syna baılanysty taraǵan málimetterge túsinikteme berdi.
