QTJ ǵımaratyndaǵy órt 12 mınýt ishinde aýyzdyqtaldy

ASTANA. QazAqparat - "Qazaqstan temir joly" kompanııasynyń ǵımaratyndaǵy órt nebary 7 mınýtqa sozyldy. Bul týraly kompanııanyń baspasóz qyzmeti habarlady. Al, órt sóndirýshiler jalyn men tútindi 12-15 mınýt ishinde tolyq aýyzdyqtaǵan.

Órt jylytý maýsymyna daıyndyq aıasynda jetinshi qabattyń shatyry men ǵımarat syrtynda júrgizilgen jóndeý jumystary saldarynan paıda bolǵan.

"Órt týraly aqparat saǵat 16.18-de kelip tústi. Mundaı mekemede, ıaǵnı, úshinshi rangta órt boldy dese, búkil gornızon órt bolǵan jerge attanýǵa mindetti. Biz oqıǵa ornyna kelip, jaǵdaıdy baqylaǵan soń, segiz tehnıkany - tórt órt sóndirýshi mashına men tórt satysy bar mashınany qaldyrdyq. 12 mınýt ishinde jalyndy tolyq aýyzdyqtadyq. Qazir eshqandaı qaýip joq, órtti tolyq sóndirdik. Órt, aldyn ala boljam boıynsha, ǵımarattyń jetinshi qabatynyń syrtynda júrgizilgen shatyrdy jóndeý jumystary sebepti oryn alǵan. Zardap shekkender joq. «Qazaqstan temir joly» kompanııasynyń osy ǵımaratynda 1800 adam otyrady, onyń myńǵa jýyǵy biz kelgenshe syrtqa shyqqan, qalǵanyn biz evakýatsııaladyq", - dedi oqıǵa ornynda jýrnalısterge túsinikteme bergen Astana qalalyq TJD Órt sóndirý qyzmeti basshysynyń orynbasary Serikhan Turarov.

Qazir kompanııa qyzmetkerleriniń barlyǵy ǵımaratqa kirdi.