QTJ bıletterdiń zańsyz satylýy týraly aqparatqa qatysty túsinikteme berdi

Kompanııanyń resmı ókili Rýslan Imanqulovtyń aıtýynsha, osyndaı jaǵdaı oryn alǵan kezde tıisti tergeý júrgizý úshin foto-vıdeo túsirilim túrindegi dáleldik qor bolýy tıis.

«QTJ bul baǵytta osyndaı jaǵdaılardy boldyrmaý boıynsha naqty mindetter belgilengen tıisti jumys júrgizip jatyr. Jolaýshylar men resimdelmegen júkti bıletsiz tasý faktilerin baqylaý jáne boldyrmaý, servıstik qyzmetkerlermen jumys júrgizý úshin zań buzǵan jol brıgadalaryna qatysty «nóldik tózimdilik» prıntsıpi engizilgen», - dedi Rýslan Imanqulov.

Onyń atap ótýinshe, barlyq qyzmettik jáne jedel tergeýler, tártiptik komıssııalardyń otyrystary barynsha ashyq túrde ótkizilip, olardy onlaın rejımde basshylyq qadaǵalap otyrady.

Budan basqa, poıyz brıgadalarynyń qyzmetkerlerin jumysqa alý talaptary qatańdatylǵan, olardyń yntalandyrylýyn jetildirý boıynsha maqsatty jumys júrgizilýde. Dálelderi bar bolsa, osyndaı birde bir jaǵdaı nazardan tys qalmaıdy», - dep túıindedi Rýslan Imanqulov.

Eske sala keteıik, Pavlodar qalasynda temirjol bıletterin zańsyz satý jaǵdaıy anyqtalǵan.

«Shilde aıynda «Qazaqstan temir joly» UK» AQ fılıaly qyzmetine monıtorıng júrgizý kezinde jolaýshylar tasymalynyń pavlodarlyq bólimshesinde «qupııa satyp alýshy» ádisi arqyly jolaýshylardy zańsyz tasymaldaý faktisi anyqtalǵan. Arnaıy monıtorıng júrgizý tobynyń músheleri, qoǵam ókilderi Pavlodar-Almaty baǵytyndaǵy jol júrý bıletteriniń zańsyz satylǵanyn anyqtady. Bılettiń quny 12 500 teńgeni quraǵan, biraq kassada artyq bılet bolǵan joq. «QTJ» AQ qyzmetkerleri qupııa satyp alýshyǵa bıletsiz jol júrip, ol úshin 20 myń teńge surady», - dep habarlady Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamentinen.

Osyǵan uqsas faktiler eldiń basqa aımaqtarynda da bolǵan, dep qosyp ótti vedomstvo. Monıtorıng qorytyndylary boıynsha, birqatar qyzmetkerler jaýapqa tartyldy.