QTJ: bıyl 44 adamdy poıyz basyp ketti, 27 adam kóz jumdy
ASTANA. KAZINFORM — «Burabay Express» elektr poıyzynda «Qazaqstan temir joly» UK» AQ – Magıstraldyq jeli dırektsııasy fılıalynyń qaýipsizdik jónindegi atqarýshy dırektory Serik Aıqynbekovpen medıa-kezdesý ótti. Spıker temirjol kóligindegi qaýipsizdikti qamtamasyz etý úshin kompanııa qabyldaǵan sharalar týraly aıtyp, jýrnalısterdiń suraqtaryna jaýap berdi. Bul týraly «Qazaqstan temir joly» UK» AQ baspasóz qyzmeti málim etti.
QTJ deregine sensek, 2025 jyldyń 8 aıynda 44 adamdy poıyz basyp ketken. Aýyr jaraqat saldarynan 27 adam kóz jumǵan. Quqyq buzýshylardyń 39%-i mas kúıinde, 36%-i belgilenbegen jerden ótken nemese qulaqqapta bolǵan, 14%-i vagon astymen joldan ótse, 11%-i — sýıtsıdtik jaǵdaılar.
— Zardap shekkender arasynda eresekterdiń qaraýynsyz jolda qalǵan 1,5 jas pen 4 jas aralyǵyndaǵy tórt bala bar. Serik Aıqynbekov ata-analardy balalarǵa temir joldaǵy tártip erejelerin túsindirýge jáne olardy jalǵyz qaldyrmaýǵa shaqyrdy. Ótken jyldyń sáıkes kezeńimen salystyrǵanda poıyzdyń astyna túsip qalý jaǵdaıy 29%-ke tómendegen, — delingen habaprlamada.
Spıker joldardy qorshaý qaýipsizdiktiń tolyq kepildigin qamtamasyz etpeıtinin atap ótti, óıtkeni turǵyndar qorshaýdy qasaqana búldirip, erejelerdi buzady. Atap aıtqanda, Shymkent bólimshesinde tolyǵymen qorshalǵan Qorǵasyn — Shymkent — Qyzylsaı ýchaskesinde eki jyl ishinde 7 adamdy poıyz basyp ketken. Jol boıynda barlyǵy 26 stantsııa men úsh aralyqty qamtıtyn 211 km qorshaý turǵyzyldy. Qosymsha taǵy 242 km qorshaý salý qajet. 2026-2027 jyldarǵa 73,6 km qorshaý salý josparlanǵan.
— 8 aıdyń ishinde lokomotıv brıgadalary 77 astam jol oqıǵasynyń aldyn alǵan. Jalpy, sońǵy bes jylda temirjol ótkelderinde 124 JKO tirkeldi, 2025 jyldyń 8 aıynda — 16. JKO-nyń negizgi sebepteri — júrgizýshilerdiń asyǵýy jáne olardyń jol júrý erejelerin saqtamaýy, — dep jazdy «Qazaqstan temir joly» UK» AQ baspasóz qyzmeti.
Ótkelderde qaýipsizdikti arttyrý úshin QTJ beınebaqylaý júıelerin engizbek. Bul shara Qaraǵandy — Maıqudyq ótkelindegi apattylyqty 2,4 ese, Shamalǵan — Aqseńgir ótkelindegi apattylyqty 9 ese tómendetýge múmkindik berdi. Búgingi tańda kameralar 44 ótkelge ornatylǵan. Ákimdikterge buzýshylyqtardy foto — jáne beınetirkeýdiń 163 keshenin ornatý jáne 60 jol ótpesiniń qurylysyn qaraý jóninde tapsyrma berildi.
Zańnamaǵa sáıkes kólik jáne ınjenerlik ınfraqurylym obektilerin salý jáne paıdalaný máseleleri jergilikti atqarýshy organdar quzyretine jatady. Osyǵan baılanysty QTJ jol ótpeleri men jaıaý júrginshiler kópirleriniń qurylysyna tehnıkalyq jaǵdaı jasaı otyryp, járdem kórsetedi.
Búgingi tańda QTJ 40 avtojol ótkeliniń qurylysyna tehnıkalyq sharttar berdi, onyń 7-i salynyp úlgergen. Sondaı-aq jaıaý júrginshiler úshin 22 kópir salýǵa tehnıkalyq sharttar berildi. Kompanııa «QazAvtoJol» balansyna beriletin 52 jol ótpesiniń qurylysy boıynsha jobalardy óz betinshe iske asyryp jatyr.
Sonymen qatar, 41 jaıaý júrginshiler kópirine, 128 jaıaý júrginshiler ótkeline jáne 247 ótkelge aǵymdaǵy jóndeý jumystary júrgizildi.
«QTJ» UK» AQ qozǵalys qaýipsizdigi deńgeıin arttyrýǵa jáne temirjol kóligindegi jazataıym oqıǵalardyń aldyn alýǵa baǵyttalǵan sharalar keshenin iske asyrýdy jalǵastyrady.
Eske sala keteıik, tamyz aıynda Shyǵys Qazaqstanda eki áıeldi poıyz basyp ketken edi.