QTJ basshysy keshikken poıyz jolaýshylarynan keshirim surady

ASTANA. KAZINFORM – Úkimet otyrysynda «Qazaqstan Temir joly» ulttyq kompanııasynyń basqarma tóraǵasy Nurlan Saýranbaev ýaqytynan keshigip keletin poıyzdardyń jolaýshylarynan aldyn ala keshirim surady.

«Sońǵy ýaqytta turǵyndar tarapynan poıyzdardyń keshigýine qatysty shaǵym kóbeıip ketti. Qandaı shara qabyldap jatyrsyzdar?» - dep surady Premer-mınıstr.

QTJ basshysy halyqtan mundaı kemshilikterge túsinistikpen qaraýdy surady. 

«Bul másele bizdiń kompanııanyń erekshe baqylaýynda tur. Osy jaǵdaı jol jóndeý jumystarymen jáne jolaýshylardyń qaýipsizdigine baılanysty. Sońǵy jyldary biz jol jóndeý jumystaryn eki ese kóbeıttik. Jolaýshylardan buǵan keshirimmen jáne túsinistikpen qaraýdy suraımyz», - dedi Nurlan Saýranbaev.