QTJ basshylyǵynyń ustalýyna qatysty kompanııa málimdeme jasady

ASTANA. KAZINFORM — «Qazaqstan temir joly» ulttyq kompanııasy basqarma tóraǵasy men «Samuryq-Qazyna» qory basshysynyń ustalýyna qatysty pikir bildirdi. Kompanııa quqyq qorǵaý organdaryna jan-jaqty járdem kórsetetinin málimdedi.

QTJ
Foto: QTJ

QTJ-nyń 14 qarashadaǵy habarlamasynda kompanııa 12 qarashada jarııalanǵan aqparatty nazarǵa alǵany aıtylǵan. Qazirgi ýaqytta ulttyq kompanııa jarııa bolǵan málimetterden basqa bul iske qatysty ózge aqparatqa ıe emes.

Kompanııa Qazaqstan Respýblıkasynyń Qylmystyq-protsestik kodeksiniń 201-babyna sáıkes sotqa deıingi tergep-tekserý derekteri jarııa etilmeıtinin eske saldy. Osy sebepti ázirge qosymsha túsinikteme bere almaıdy.

— Osy habarlamany daıyndaý kezinde «QTJ» UK» AQ jarııa túrde aıtylǵannan basqa, osy másele boıynsha aqparatqa ıe emes. Qazaqstan Respýblıkasy Qylmystyq-protsestik kodeksiniń 201-babyna sáıkes sotqa deıingi tergep-tekserýdiń málimetteri jarııa etilýge jatpaıdy. Osyǵan baılanysty «QTJ» UK» AQ osy kezeńde qosymsha túsiniktemeler bere almaıdy, — delingen habarlamada.

Sonymen qatar QTJ men onyń kompanııalar toby shtattyq rejımde jumysyn jalǵastyryp jatqanyn habarlady. Kompanııa ınvestorlar, kredıtorlar, halyqaralyq qarjy ınstıtýttary men iskerlik áriptester aldyndaǵy barlyq mindettemesi kúshinde qalatynyn jáne kelisimshart talaptaryna saı oryndalatynyn rastady.

Aıta keteıik, buǵan deıin Ulttyq qaýipsizdik komıteti «Qazaqstan temir joly» UK» AQ basqarma tóraǵasy Eljas Otynshıev pen «Samuryq-Qazyna» AQ basqarma tóraǵasy Nurlan Jaqypovtyń sybaılas jemqorlyq qylmysyn jasady degen kúdikpen ustalǵanyn rastaǵan bolatyn.

Olar 11 qarashada ustalǵan. Qazirgi ýaqytta tergeý amaldary júrgizilip jatyr.

Eske salaıyq, munyń aldynda Eljan Otynshıev ustalǵan soń, QTJ jumysy qalaı júrip jatqanyn jazyp edik.