QTJ Bas prokýratýradan qyz zorlaǵan jolserikterdiń jazasyn kúsheıtýdi surady

NUR-SULTAN. QazAqparat – «Qazaqstan Temir Joly» UK» AQ basqarma tóraǵasy Saýat Myńbaev jáne kompanııa qyzmetkerleri QR Bas prokýratýrasynan jolaýshyny jábirlegen jolserikterdiń jazasyn qatańdatýdy surady, dep habarlaıdy QazAqparat.

Saýat Myńbaev QR Bas prokýrory Ǵızat Nurdáýletovke arnaıy hat joldady.

«QTJ» UK» AQ basshylyǵy men qyzmetkerleri 2018 jyldyń 26 qyrkúıeginde poıyz jolaýshysyna jábir kórsetken burynǵy jolserikter Jetes Úmbetalıev pen Qolqanat Qurmanııazovtyń áreketin qatań synaıdy», - delingen áleýmettik jelide jarııalanǵan hat mátininde.

Osyǵan baılanysty, kompanııa burynǵy jolserikterge jasaǵan qylmysyna laıyq jaza taǵaıyndaýdy suraǵan.

Aıta keteıik, Bas prokýratýra men QTJ atalǵan hatty rastady.

Eske sala ketsek, qylmys ótken jyldyń aıaǵynda bolǵan. Áıel elordadaǵy ǵylymı konferentsııaǵa qatysyp, týǵan qalasyna kele jatqan. Kúdiktiler jymysqy áreketin iske asyrǵan kezde poıyz Qostanaı oblysynyń Taran aýdany aýmaǵynda bolǵandyqtan, is Taran aýdandyq sotynda qaraldy. 26 shildede eki jolserikke úkim oqyldy.