QTJ Álııa Nazarbaevanyń kompanııasynan nege bas tarta almaı otyr

«Qazaqstan temir joly» AQ basqarma tóraǵasy Nurlan Saýranbaev burynǵy prezıdent Nursultan Nazarbaevtyń kishi qyzy Álııa Nazarbaevanyń kompanııasymen nelikten jumys istep otyrǵanyn túsindirdi, dep habarlaıdy Kazinform.

Úkimet úıindegi baspasóz máslıhatynda QTJ basshysyna «Álııa Nazarbaevaǵa tıesili «Instant Peıments» kompanııasymen qarym-qatynasty úzdińizder me?» degen suraq qoıyldy.

«Birinshiden, bul problemanyń uzaqqa sozylǵanyn bilesizder. Osy másele týyndaǵan kezde joǵaryda atalǵan aktsıoner (Á. Nazarbaeva – red.) birden aktsıonerler quramynan shyqty. ıAǵnı, ol joq. Biraq, mınıstr Baǵdat Mýsın osynda qasymda otyr, ol qazir-aq kompanııamen kelisimshartty buzýǵa bolatynyn biledi. Biraq odan keıin biz onlaın satyp alý qyzmetin usyna almaı qalamyz. Demek kompanııany osylaı birden julyp alyp tastaý múmkin emes. Biraq qazirgi ýaqytta quzyretti berý aktisi júrip jatyr – ashyq konkýrs ótti, belgili bir kompanııa jeńip aldy jáne qazir "Instant Peıment" JShS-den osy qyzmetti konkýrsta jeńiske jetken jańa kompanııaǵa tapsyrý júrip jatyr. Bul protsess 1 jeltoqsanda aıaqtalady», - dep jaýap berdi N. Saýranbaev.

Buǵan deıin QR Premer-Mınıstri Álıhan Smaıylov «Qazaqstan temir jolynyń» qyzmetine kóp shaǵym túskenin aıtqan edi.