QTJ Alakólge qatynaıtyn poıyzdardaǵy jolaýshy ornyn kóbeıtedi

ASTANA. QazAqparat - Alakólge baratyn poıyzdardaǵy jolaýshy oryndarynyń sany 2023 jyly jazǵy týrıstik maýsymǵa ótken jyldyń sáıkes kezeńimen salystyrǵanda 6% ósedi. Bul týraly QazAqparat «Qazaqstan temir jolyna» silteme jasap habarlaıdy.

Sonymen qatar jolaýshylarǵa 276 myńnan astam oryn usynylady. Alakól baǵytynda jolaýshylar poıyzdary Astana, Almaty, Shyǵys Qazaqstan jáne Abaı oblystarynan 11 baǵyt boıynsha júrýdi jalǵastyrady. Alǵash ret «Astana – Dostyq» baǵyty boıynsha «Talgo» poıyzy iske qosylady.

Qazirgi ýaqytta «Jolaýshylar tasymaly» AQ ákimdiktermen, avıatasymaldaýshylarmen jáne týroperatorlarmen birlesip Shymkent, Pavlodar, Óskemen, Qyzylorda qalalarynan Alakólge deıin ıntermodaldyq tasymaldardy (kóliktiń eki nemese odan da kóp túri) qalyptastyrý múmkindigin qarastyrýda.