QTJ Aqtaý portynda astyq qabyldaýdaǵy ýaqytsha shekteýge túsinikteme berdi

ASTANA. KAZINFORM — «Qazaqstan temir joly» UK» AQ «Yqpaldastyrylǵan josparlaý dırektsııasynyń» fılıal dırektorynyń orynbasary Ǵanı Esenbaev Aqtaý portynda eksporttyq astyqty qabyldaýdaǵy ýaqytsha shekteýge baılanysty pikir bildirdi. 

Onyń aıtýynsha, uzaq irkilistiń negizgi sebebi aýa raıynyń qolaısyzdyǵy bolyp otyr.

 

— Kún raıy buzylyp tur, jel soǵyp, tolqyn turdy. Bul Aqtaý portynda júk tıeýdegi irkilis sebepteriniń biri. Ekinshi sebebi — Kaspıı basseındegi barlyq keme Astrahan-Iran baǵytynda qatynaýǵa múddeli. Óıtkeni, Iranda Astrahan oblysynda suranysqa ıe júk bar. Olar — karbamıd, tsement pen travertın. Ókinishke oraı, bizge Iran tarapynan júk óte az keledi. Sondyqtan da vagon operatorlarymyz keme jaldaǵan kezdegi tarıf aıyrmasy 10-nan 15 dollarǵa deıin jetedi, — dep túsindirdi ol.

Ǵanı Esenbaevtyń dereginshe, qyrkúıekte Ataý portyna ne bári 14 keme keldi. Bul atalǵan kezeń úshin óte tómen kórsetkish sanalady.

— Osyǵan baılanysty ınfraqurylymda shamamen 700 vagon turyp qaldy. Biz júk tıeýdegi shekteýler týraly májbúrli sharany jarııa etip, Astyq odaǵy jáne negizgi iri operator — Astyq transpen túsindirý jumystary júrgizildi, — dedi QTJ ókili.

Onyń aıtýynsha, eger barlyq júk vagondarda turyp qalsa, onda jyljymaly quram da irkiledi. Al qazir Ózbekstan, Aýǵanstan jáne Tájikstan baǵytynda astyq eksportyna suranys joǵary bolyp tur.

— Qazir 700-den 150 vagonǵa deıin azaıdy. Alaıda, termınaldar tolyp tur, — dedi kompanııa ókili.

Onyń aıtýynsha, jyl saıyn qarashanyń sońy men jeltoqsannyń basynda Astrahan-Iran baǵytynda qatynaıtyn kemeler Qazaqstan portyna oralady. Sebebi bul ýaqytta Astrahan shyǵanaǵynda muz qatady.

Aıta keteıik, Aqtaý halyqaralyq teńiz portynyń bazasynda iri konteınerlik hab salynyp jatyr.