QTJ 70 jyldary shyǵarylǵan lokomotıvterden arylmaqshy

ASTANA. KAZINFORM – «Qazaqstan Temirjoly» ulttyq kompanııasy ótken ǵasyrdyń 70-80 jyldarynda shyǵarylǵan lokomotıv parkiniń eski serııalaryn joıýdy josparlap otyr. Kompanııanyń baspasóz qyzmeti Kazinform saýalyna joldaǵan jaýapta osyndaı málimet berdi.

- Park eskirip bara jatqanyn jáne júk parkin jańartý qajettiligi bar ekenin, sondaı-aq tranzıttik trafıktiń ulǵaıýyn eskere otyryp, ótken ǵasyrdyń 70-80 jyldarynda shyǵarylǵan lokomotıv parkiniń eski serııalaryn joıý jospary bar, - dep jazylǵan jaýapta.

Bul jerde áńgime amerıkalyq Wabtec kompanııasymen aradaǵy jalpy somasy 4,2 mıllıard dollar bolatyn kelisim týraly bolyp otyr. 

Osy kelisim aıasynda Wabtec kompanııasy 2036 jylǵa deıin QTJ balansyna jyl saıyn 30 lokomotıv berip otyrýǵa mindettelgen.

- Lokomotıvterdi jetkizý jónindegi 2026 jylǵa deıingi qoldanystaǵy shartqa baılanysty 300 birlik kóleminde lokomotıvterdi jetkizýdiń jańa sharty 2027 jyldan 2036 jylǵa deıingi kezeńde jylyna orta eseppen 30 birlikke josparlanǵan. Olarǵa «Astana Dızel Servıs» zaýytynda óndiriletin dızeldi qozǵaltqyshtar ornatylady. Jańa lokomotıvterde tartqysh elektr qozǵaltqyshtarynyń jańa túrleri, generatordyń jańa túri, dızeldi únemdeıtin salqyndatý júıesi qoldanylady, - delingen resmı málimette.

TE33AT serııaly lokomotıvterde aýa baptaǵysh, tońazytqysh, mıkrotolqyndy pesh, bıo dárethana ornatylady.

Eske salsaq, Memleket basshysy Qasym-Jomart Toqaevtyń Nıý-Iork qalasyna resmı sapary aıasynda AQSh Saýda mınıstri Govard Latnıktiń qatysýymen amerıkalyq Wabtec kompanııasymen jalpy somasy 4,2 mıllıard dollar bolatyn kelisimge qol qoıý rásimi ótken edi.