«QTJ» 7 aıda 52,1 mln tonna eksporttyń júgin tasymaldaǵan

NUR-SULTAN. QazAqparat – «Qazaqstan temir joly» ulttyq kompanııasy 7 aıdaǵy temir jol kóligimen júk tasymaldaý qyzmetin qorytyndylady, dep habarlaıdy tilshisi.

«Samuryq Qazyna» aqparat alańynda ótken brıfıngide «Qazaqstan temir joly» UK» AQ basqarma tóraǵasynyń orynbasary Oralhan Qulaqov byltyrǵymen salystyrǵanda júk tasymalynda ósim bar ekenin atady.

«Ótken aıda «QTJ» jelisi boıynsha 147 mln tonnadan astam júk tıeldi. Bul ótken jylmen salystyrǵanda 4,4 mln tonna artyq. Respýblıka ishinde 95,3 mln tonnadan astam, al eksportqa 52,1 mln tonnadan astam júk tasymaldanǵan. Byltyrǵy qańtar-shildemen salystyrǵanda Qazaqstan men Qytaı arasyndaǵy júk tasymaldaý kólemi 5 paıyz ósip, 12,7 mln tonnaǵa jetti. Eki el arasyndaǵy tasymaldardy arttyrýdyń alǵysharttarynyń biri – júkterdi konteınerlerge tıeý», - dedi «QTJ» ókili.

Sondaı-aq, ol qazir Úkimet deńgeıinde bıznes qaýymdastyqtardyń, «QTJ» jáne basqa da múddeli tarap ókilderiniń qatysýymen júkterdi konteınerleý týraly jol kartasy ázirlenip jatqanyn atady.

«Konteınerleý máselesine keńinen toqtalǵym keledi. Búginde osyndaı fýndamentaldy tásil kerek. Tasymaldaýshylardyń bárin qazir Qytaı baǵytyna júk jóneltý boıynsha problema bar», - dedi «QTJ» basqarma tóraǵasynyń orynbasary.