QTJ 2027 jyldyń sońyna deıin 131 jolaýshylar vagonyn satyp alady
ASTANA. KAZINFORM – Qazaqstanda sońǵy tórt jylda jolaýshylar poıyzdarynyń parki jańartylyp, 418 jańa vagon satyp alyndy. Jyljymaly quramdy jańǵyrtý jumystary jalǵasady.
Jańartý ishki jáne halyqaralyq baǵyttardy qamtydy.
– Qazirgi ýaqytta jolaýshylar vagondarynyń parki 2 159 birlikti quraıdy. 2022–2026 jyldar aralyǵynda 418 jańa jolaýshylar vagony satyp alynyp, olar Qazaqstan ishindegi jáne halyqaralyq baǵyttarǵa jiberildi, – dep habarlady «Qazaqstan temir joly» UK» AQ baspasóz qyzmeti.
Kompanııa bıyl taǵy 131 jolaýshylar vagonyn satyp alý týraly kelisimshart jasasty. Vagondar 2027 jyldyń sońyna deıin jetkiziledi. Sonymen qatar 2030 jylǵa deıin taǵy 557 joǵary tehnologııalyq vagon jetkizý josparlanǵan.
Sondaı-aq jańa lokomotıvterdi jetkizýge arnalǵan kelisimsharttar da jasalǵan. Qazirgi ýaqytta ınventarlyq parkte 1 813 lokomotıv bar, olardyń tozý deńgeıi – 46,2%.
– 2026-2036 jyldar aralyǵynda 1 082 lokomotıv satyp alý josparlanyp otyr. Bul tozý deńgeıin 29,8%-ǵa deıin tómendetýge múmkindik beredi. 2026 jyldyń basynan beri lokomotıvter parki 144 zamanaýı tehnıkamen tolyqty, – dep málimdedi kompanııanyń baspasóz qyzmeti.
QTJ málimetinshe, tehnıkany jáne ınfraqurylymdy jańǵyrtýǵa jolaýshylar aǵynynyń artýy sebep bolyp otyr. 2026 jyldyń alǵashqy alty aıynyń qorytyndysy boıynsha jolaýshylar aınalymy 5 544 mln jolaýshy-shaqyrymdy qurap, ótken jyldyń sáıkes kezeńimen salystyrǵanda 2,3%-ǵa ósti.
Kompanııa temirjol tasymalyna suranys aldaǵy jyldary da ósedi dep boljap otyr.
– 2027–2030 jyldarǵa arnalǵan josparǵa sáıkes, jolaýshylar aınalymyn kezeń-kezeńimen 2027 jyly – 12 058 mln, 2028 jyly – 12 353 mln, 2029 jyly – 12 780 mln jáne 2030 jyly 13 279 mln jolaýshy-shaqyrymǵa deıin jetkizý kózdelgen, – dep atap ótti baspasóz qyzmeti.
Kompanııanyń málimetinshe, jyljymaly quram men lokomotıvter parkin jańartý jolaýshylar tasymalynyń turaqty ósimin qamtamasyz etip, kórsetiletin qyzmet sapasyn arttyrýǵa múmkindik beredi.
Aıta keteıik, buǵan deıin áıelder vagondarymen 860 myń jolaýshy tasymaldanǵany habarlandy.
