Qasym-Jomart Toqaev: Úkimet aıryqsha quzyretke ıe boldy

ASTANA. KAZINFORM – Jalań sózge ýaqyt ketirmeı, naqty áreket jasap, saıası jaýapkershilik tanytý qajet. Prezıdent Qasym-Jomart Toqaev qaıta jasaqtalǵan Úkimettiń keńeıtilgen otyrysyn qorytyndylaı kelip, osyndaı paıym aıtty. 

«Qazir búkil álem asa kúrdeli tarıhı kezeńde ómir súrip jatyr. Osyndaı kezeńde memleketterdiń kópjyldyq damý baǵdary aıqyndalady. Sondyqtan, biz ýaqyt talabyna saı bolyp, jyldam ári batyl qımyldaýymyz kerek.
Jalań sózge ýaqyt ketirmeı, naqty áreket jasap, saıası jaýapkershilik tanytý qajet. Dál qazirgi kezeńde árbir kúnniń qadirin durys túsinip, qolda bar múmkindikti durys paıdalanýymyz kerek. Áıtpese, jahandyq básekege ilesý qıyn bolady», - dedi Memleket basshysy.

Qasym-Jomart Toqaev tabysqa jetý úshin memleket pen qoǵam ortaq múdde jolynda árdaıym birge bolýy kerektigin eske saldy.

«Biz órkenıetti ult retinde tek jarqyn bolashaqqa umtylyp, tek alǵa qaraı qadam basýymyz qajet. Qazir Úkimet aıryqsha quzyretke ıe boldy. Osy múmkindikti durys paıdalaný kerek. Shuǵyl túrde tıisti sheshimderdi qabyldaý qajet. 
Men búgin birqatar mańyzdy máselege toqtaldym. Árıne, basqa da ózekti máseleler bar. Úkimettiń aldynda turǵan mindetter – óte mańyzdy. Dereý jumysqa kirisý kerek. Túptep kelgende, ekonomıkanyń ár salasynda túbegeıli reformalar jasalýǵa tıis», - dedi Prezıdent.

Aıta keteıik, Úkimet úıinde qaıta jasaqtalǵan Úkimettiń keńeıtilgen otyrysy ótip jatyr.