QTK jáne Alatau City Bank «Orda aımaq» jáne «Orda aımaq plıýs» baǵdarlamalary boıynsha yntymaqtastyqty keńeıtpek
ASTANA. KAZINFORM — «Qazaqstan Turǵyn úı Kompanııasy» AQ (QTK, «Báıterek» UIH» AQ-nyń enshiles uıymy) jáne «Alatau City Bank» AQ «Orda aımaq» jáne «Orda aımaq plıýs» turǵyn úı baǵdarlamalaryn iske asyrý sheńberinde yntymaqtastyq týraly kelisim jasasty.
Qujat Qazaqstannyń óńirlerinde azamattarǵa turǵyn úı satyp alýǵa turǵyn úı qaryzdaryn berý kezinde taraptardyń ózara is-qımylyn kózdeıdi. Kelisim aıasynda Alatau City Bank turǵyn úı qaryzdaryn rásimdeýge jáne berýge baılanysty máseleler boıynsha konsýltatsııalyq qyzmetter kórsetip, QTK múddesin bildiredi. Sondaı-aq bank qaryz alýshylardyń qujattaryn qabyldap, tekserip, kredıttik ótinimderdi qalyptastyrady jáne olardy qaraý úshin QTK-ǵa joldaıdy.
«Orda aımaq» jáne «Orda aımaq plıýs» baǵdarlamalary turǵyn úı qurylysyna úlestik qatysý týraly zańnamaǵa sáıkes QTK kepildigi bar, Qazaqstan óńirlerindegi turǵyn úı qurylysy obektilerine qoldanylady. Bul rette Astana, Almaty jáne Shymkent qalalary baǵdarlamalarǵa qatyspaıdy.
— Banktermen seriktestik ornatý azamattar úshin turǵyn úı qaryzyn alý protsesin barynsha yńǵaıly ári túsinikti etýge múmkindik beredi. Kelisim aıasynda Alatau City Bank-tiń aımaqtyq ofısteri áleýetti qaryz alýshylarǵa konsýltatsııa berýden jáne qujattardy qabyldaýdan bastap qajetti sharttardy rásimdeýge deıin ózara is-qımyldyń qosymsha núktesine aınalady. Bul rette turǵyn úı qaryzyn berý týraly barlyq sheshimderdi belgilengen baǵdarlama talaptaryna sáıkes QTK qabyldaıdy, — dep atap ótti «Qazaqstan Turǵyn úı Kompanııasy» AQ Basqarma tóraǵasy Altaı Kýzdıbaev.
Ózińizge qolaıly baǵdarlamany tańdańyz:
«Orda aımaq»
Syıaqynyń belgilengen mólsherlemesi — jyldyq 15,9% (JTSM 16,97%-dan 18,32%-ǵa deıin).
«Orda aımaq Plıýs»
Syıaqynyń ıkemdi mólsherlemesi — jyldyq 10,9%-dan 14,9%-ǵa deıin (JTSM 11,70%-dan 16,20%-ǵa deıin). Mólsherleme bastapqy jarnanyń mólsheri men kredıtteý merzimine baılanysty: bastapqy jarna neǵurlym joǵary bolsa, mólsherleme soǵurlym tıimdi!
Eki baǵdarlamaǵa da ortaq sharttar:
- Bastapqy jarna: 20%-dan bastap.
- Nesıe somasy: 2 mln teńgeden 75 mln teńgege deıin.
- Merzimi: 24 aıdan 240 aıǵa deıin (20 jylǵa deıin).
- Turǵyn úıdiń bastapqy baǵasy tómen: qurylys kezeńindegi baǵa daıyn páterdiń baǵasynan tómen.
Qurylys obektileriniń sıpattamasymen QTK-niń Turǵyn úı portalynan myna silteme boıynsha tanysýǵa bolady.
