QTQ: Tólqujattarynda JSN jazylmaǵan qazaqstandyqtar shekaradan ótkizilmeıdi
ASTANA. QazAqparat - Jeke sáıkestendirý nómiri (JSN) joq ulttyq tólqujattar jaramsyz bolyp tabylady, olardyń ıeleri memlekettik shekaradan ótkizilmeıdi. Bul týraly QR UQK Shekara qyzmetine silteme jasap, Qazaqstandyq týrıstik qaýymdastyq habarlady.
«Azamattardyń QR shekarasy arqyly ótkizilmeýine baılanysty shaǵymdar men kıkiljiń jaǵdaılardy boldyrmaý maqsatynda shekaradan asýdy josparlap otyrǵan QR azamattarynyń jeke basyn kýálandyratyn qujattarynda JSN jazylmasa, QR-nyń «Jeke basty kýálandyratyn qujattar týraly» Zańynyń 7-babyndaǵy 2-bólimine, sondaı-aq QR-nyń «Sáıkestendirý nómirleriniń ulttyq tizilimdemeleri týraly» Zańynyń 13-babyndaǵy 3-bólimine sáıkes olar jaramsyz bolyp tanylady. Osylaısha, qalyptastyrylǵan JSN jazylmaǵan qujattardy usynǵan QR azamattary Qazaqstan Respýblıkasynyń memlekettik shekarasynan ótkizilmeıdi. Mundaı qujattar QR-dyń «Memlekettik shekara týraly» Zańyndaǵy 66-baptyń 9-bólimine sáıkes tárkilenedi», - dep habarlaıdy qaýymdastyq Shekara qyzmetiniń habarlamasyna silteme jasap.
QTQ Shekara qyzmetimen konsýltatsııa ótkizgenin habarlady. Shamamen 2004 jylǵa deıin shyǵarylǵan eski úlgidegi tólqujattarda bettiń oń jaǵynda tólqujat ıesiniń jynysy kórsetilgen jerde JSN týraly aqparat joq.
Biraq ta bul aqparat mashınamen eseptelgen tómendegi joldarda tegi, esimi, tólqujat nómiri, týǵan jyly keri tártippen jazylǵan, sondaı-aq jynysy, tólqujattyń shyǵarylǵan kúni jáne sońǵy 12 san - bul qalyptastyrylǵan JSN.
«Tólqujattyń birinshi betindegi tómendegi mashınamen eseptelgen joldar bar QR azamattaryn Shekara qyzmeti ádettegi tártippen jiberedi. Qalyptastyrylǵan JSN jáne mashınamen eseptelgen jazýlar (ıaǵnı eski tólqujattarda) joq QR azamattary memlekettik shekara arqyly ótkizilmeıdi», dep habarlady Qazaqstannyń týrıstik qaýymdastyǵy.
