KTK teńiz termınalynda munaıdyń tógilý saldaryn joıý jumystary aıaqtaldy
ASTANA. KAZINFORM — Kaspıı Qubyr Konsortsıýmynyń (KTK) teńiz termınaly akvatorııasynda tótenshe jaǵdaı saldaryn joıý jumystary aıaqtaldy. Jergilikti aýqymdaǵy tótenshe jaǵdaı rejımi resmı túrde alyndy, dep habarlaıdy Kazinform agenttiginiń tilshisi.
Kompanııanyń habarlaýynsha, 2025 jyldyń 30 tamyzynda teńiz betiniń jaǵdaıyna obektıvti baqylaý júrgizilgennen keıin, operatsııany basqarý shtaby KTK teńiz termınaly (MT KTK) akvatorııasynda munaı tógilýiniń aldyn alý jáne joıý jospary (MTJJ) aıasyndaǵy negizgi is-sharalardyń aıaqtalǵanyn málimdedi.
Eske salaıyq, bul jospar KTK-2 aılaq qurylǵysynyń shlangileri arqyly tankerge júk tıeý kezinde teńiz betine munaı tógilgennen keıin engizilgen bolatyn.
— Qazirgi ýaqytta tógilgen munaıdyń naqty kólemi anyqtalýda, oqıǵanyń sebepterine qatysty tergeý júrgizilýde. Oqıǵa barysynda aılaq qurylǵysynan tankerge deıingi qalqymaly shlangtiń teńizdegi avarııalyq ajyratý tetigi iske qosylǵan, — dep habarlady kompanııa ókilderi.
Munaı tógilgen jer jedel túrde oqshaýlanǵan, bul tıisti qadaǵalaý organdary tarapynan rastaldy.
Operatsııaǵa 13 súıretkish kemesi, 4 shaǵyn keme, 5 munaı jınaıtyn skımmer jáne 9 qalqymaly rezervýar tartyldy. Sonymen qatar, 1000 metrden astam bondyq qorshaýlar ornatyldy. Jınalǵan munaı-sýly emýlsııa KTK teńiz termınalyna jetkizilip, keıin joıylýǵa jiberildi.
Ekologııalyq baqylaý operatsııa barysynda úzdiksiz júrgizildi jáne aldaǵy ýaqytta da jalǵasady — teńiz sýynan táýligine keminde eki ret synama alynyp otyrady.
Sonymen qatar, mamandar jaǵalaý jolaǵyna vızýaldy tekserý júrgizdi. Munaıdyń nemese munaı quramdy qabyqtyń tabylmaǵany habarlandy.
29 tamyzda KTK teńiz termınalynda tankerge júk tıeý kezinde KTK-2 aılaq qurylǵysynyń shlangileri arqyly teńizge munaı tógilgen bolatyn.
Eske sala keteıik,buǵan deıin Kaspıı qubyr konsortsıýmynyń (KTK) Teńiz termınalynda KQK-3 shyǵarma aılaq qurylǵysyndaǵy qalqymaly jáne sýasty shlangyny josparǵa saı aýystyrý jumysy bastalǵanyn jazǵan edik.