KTK tarıfti ózgertý máselesin qarastyryp jatqan joq – Bas dırektor

ASTANA. KAZINFORM - «Kaspıı Qubyr Konsortsıýmynyń» aktsıonerleri ázirge munaı tasymaldaý júıesi boıynsha tarıfti ózgertý máselesin qarastyryp jatqan joq. Bul týraly KTK bas dırektory Nıkolaı Gorban PMEF-2025 aıasynda ótken is-sharanyń kýlýarynda málimdedi, dep habarlaıdy Kazinform agenttiginiń tilshisi Finmarket-ke silteme jasap.

– Bizdiń tarıf birkelki, standartty, ony ózgertý týraly qazirgi tańda eshqandaı talqylaý joq. Aktsıonerlerdiń biri bul máseleni dıvıdendten kóbirek paıda alý turǵysynan kótergen bolatyn, biraq ázirge belsendi talqylanǵan joq. Sebebi bizdiń dıvıdend saıasaty erekshe – biz taza tabystyń 50%, 70%, nemese 25% emes, qalǵan barlyq qarajatty taratamyz, – dedi Gorban.

2024 jylǵy qarashada konsortsıým aktsıonerleriniń biri – «Transneft» AQ – KTK basqarý organdary jobanyń qarjylyq tıimdiligin arttyrýǵa baǵyttalǵan usynystardy talqylaǵanyn habarlaǵan bolatyn.

KTK bas dırektory Konsortsıým júıe jumysynyń tıimdiligin arttyrý máselelerine erekshe kóńil bóletinin atap ótti.

– Biz únemi ońtaılandyrýmen aınalysamyz, keıbir baptar boıynsha shyǵyndardy qysqartyp jatyrmyz. Mysaly, teńiz termınalynda qosymsha aılaq qabyrǵasyn salýdan bas tarttyq. Taldaý nátıjesinde onyń tıimsiz ekenin túsindik. Sol sııaqty, sol teńiz termınalynda jańa ákimshilik-turmystyq ǵımarat salý jobasynan da bas tarttyq, – dedi ol.

Eske salaıyq, KTK – Qazaqstannyń batysyndaǵy jáne Reseıdiń Kaspıı shelfindegi munaı ken oryndaryn Novorossııskidegi teńiz termınalymen baılanystyratyn júıe. Marshrýttyń uzyndyǵy – 1511 km.

2024 jyly konsortsıým júıe arqyly 63,01 mln tonna munaı tasymaldady, onyń ishinde shamamen 55 mln tonnasy – Qazaqstannan jetkizilgen.

KTK aktsıonerleri qatarynda «Transneft» pen Reseıden bólek, Qazaqstan da bar (onyń úlesi – «QazMunaıGaz» – 19% jáne Kazakhstan Pipeline Ventures LLC – 1,75%, barlyǵy 20,75%), sondaı-aq Chevron Caspian Pipeline Consortium Company – 15%, LUKOIL International GmbH – 12,5%, Mobil Caspian Pipeline Company – 7,5%, Rosneft-Shell Caspian Ventures Limited – 7,5%, BG Overseas Holding Limited – 2%, Eni International N.A. N.V. – 2% jáne Oryx Caspian Pipeline LLC – 1,75%.

Osyǵan deıin KTK-nyń munaı aıdaý stansasyna dronmen shabýyl jasalǵany týraly jazdyq.