KTK-nyń munaı aıdaý stansasyna dronmen shabýyl jasaldy

ASTANA. KAZINFORM — Kaspıı qubyr konsortsıýmynyń «Kropotkınskaıa» munaı aıdaý stansasyna ushqyshsyz ushatyn apparatpen shabýyl jasaldy. Bul aqparatty atalǵan konsortsıým baspasóz qyzmeti rastap otyr.

— 2025 jyldyń 17 aqpanynda Kaspıı qubyr konsortsıýmynyń munaı-kólik nysany – «Kropotkınskaıa» munaı aıdaý stansasy ushqyshsyz ushatyn apparat shabýylyna ushyrady. Lańkestik soqqyny 7 ushqyshsyz ushatyn apparat jarylǵysh zattan bólek metall zaqymdaǵysh elementtermen jasady. Shabýyl nysan jumysyn buzyp qana qoımaı, sonymen birge stansa jedel qyzmetkerlerin ólim-jitimge ushyratý maqsatymen ýaqyt jıiligin salyp júzege asyryldy, — delingen konsortsıým aqparatynda.

Taratylǵan málimetke qaraǵanda, stansa qyzmetkerleri arasynda zardap shekkender joq. Konsortsıým qyzmetkerleriniń jedel ári uıymdasqan jumysynyń arqasynda munaı tógilgen joq.

Shyǵyndy baǵalaý jáne stansanyń jumysqa qabiletin qalpyna keltirý ýaqytyn anyqtaý úshin oqıǵa ornyna mamandar toby shyqty. 

— Qazirgi ýaqytta «Kropotkınskaıa» munaı aıdaý stansasy isten shyǵyp tur. Teńiz-Novorossıısk qubyrymen munaı tasymaldaý atalǵan munaı aıdaý stansasyn aınalyp ótip, tómendetilgen munaı aıdaý rejıminde júzege asyrylyp jatyr, — dep atap ótedi kompanııadan.

Elimizdiń Energetıka mınıstrliginiń málimetinshe atap ótýinshe, Qazaqstan munaı úshin KTK tarapynan esh shekteý joq. Munaıdy qabyldaý shtattyq rejımde júzege asyrylýda.

«Kropotkınskaıa» munaı aıdaý stansasy Kýbannyń Kavkaz aýdanynda ornalasqan jáne Reseı aýmaǵyndaǵy KTK-nyń iri munaı aıdaıtyn stasasy sanalady. 

Halyqaralyq konsortsıýmnyń barlyq aktsıoneri, onyń ishinde AQSh pen Eýropada kompanııalarynyń ókilderi munaı aıdaý stansasyna jasalǵan shabýyl jáne onyń saldary jaıly qulaǵdar etilgen.

Buǵan deıin Kaspıı qubyr konsortsıýmy Qazaqstannan 1 jylda 53,8 mln tonna munaı tasymaldaǵany habarlandy.