KTK efırindegi «Nasha Kazasha» jobasynyń ony qurýshylarǵa eshqandaı qatysy joq - joba avtorlary
ALMATY. 29 naýryz. QazAqparat - 2012 jyldyń naýryz aıynan bastap «Nasha Kazasha» telejobasy resmı túrde jabyldy.
Al KTK efırinde týra osyndaı ataýmen kórermenderge kórsetilgen jobanyń «Nasha Kazasha» jobasyn qurýshylardyń jumysyna eshqandaı qatysy joq. Sonymen qatar, bul jaǵdaı avtorlyq quqyqty buzý bolyp tabylady. Bul týraly búgin Almatyda ótken baspasóz máslıhatynda «Nasha Kazasha» jobasyn qurastyrýshylar Dáýit Shaıhıslamov pen Nurtas Adambaev málimdedi.
«Joba ataýy - joba qurastyrýshylary oılap tapqan dúnıe jáne de osy ataýdy, onyń belgisi men logotıpin qoldaný quqyǵy Shaıhıslamov pen Adambaevqa, ıaǵnı bizge tıesili bolyp tabylady», - dep atap ótti olar.
Esterińizge sala keteıik, áıgili brıtandyq «Little Britain» sketch-shoýynyń bir túri bolyp tabylatyn reseılik «Nasha Russia» jobasyna uqsas qazaqstandyq ázil-ospaq «Nasha KZsha» («Nasha Kazasha») jobasy 2007 jyldyń 30 qarasha kúni Almaty qalasynda (Respýblıka saraıynda) alǵashqy ret iske qosylyp, keıinirek baǵdarlama KTK telearnasynda kórsetile bastady.
Óziniń alǵashqy ret kórsetilgen sátinen bastap joba joǵary tabysqa jetti: joǵary reıtıng, úzdiksiz gastrolder, mıllıondaǵan jankúıerler, búkil el boıynsha ashylǵan jankúıerler klýby, kıno jáne televızııa prodıýserleriniń tarapynan túsken on shaqty usynystardyń nátıjesinde 2012 jylǵa qaraı joba óziniń tanymaldyǵynyń shyńyna jetti. «FORBS» jýrnalynyń sońǵy nómirlerinde elimizdegi eń baı shoý-bıznes ókilderiniń reıtıngisinde «Nasha Kazasha» jobasynyń úshinshi oryndy ıelenýi osyny rastaıdy.
Joba birshama ýaqyt boıy «KTK» telearnasynyń efırinde shyǵyp júrdi. Keıin Shaıhıslamov pen Adambaev baǵdarlamany jaýyp, «7 arna» efırine aýysyp, rekord jasaýdy jáne eń joǵary televızııa reıtıngterine qoljetkizýdi jalǵastyra berdi. 2011 jyly «7 arnanyń» efırinde osyǵan uqsas baǵdarlamalar men «Aýyldan qashý» dep atalatyn serıal kórermenderge jol tartty. Etıkalyq kózqarastarǵa baılanysty apta saıyn shyǵyp júrgen «Nasha kazasha» baǵdarlamasynyń nusqasyn «KZ-landııa» ataýymen shyǵarý uıǵaryldy.
Osyndaı joǵary tabys pen tanymaldyqqa jetý - joba qatysýshylarynyń barlyǵynyń orasan zor dene jáne oı eńbeginiń nátıjesinde múmkin boldy! Óziniń jeke ónimderi men turaqty shyǵarmashylyq múmkindikteri bar bıznes qurylymǵa aınalǵannan keıin Dáýit pen Nurtas atalǵan jobany onyń naǵyz shyrqaý shyńyna jetken shaǵynda jabý týraly sheshimdi qabyldady. «Alaıda bul sheshim bıznestiń ózin jaýyp tastaýdy bildirmeıdi», - deıdi olar.
