Kitaphanalarǵa kelýshiler sany 57 mln-ǵa jetti
ASTANA. KAZINFORM — Qazaqstan kitaphanalaryna el boıynsha mıllıondaǵan oqyrman kelgen. Búginde elde 3 887 qoǵamdyq kitaphana jumys isteıdi, olardyń jalpy qory 72,5 mıllıonnan astam kitapty quraıdy, dep habarlaıdy Mádenıet jáne aqparat mınıstrliginiń baspasóz qyzmeti.
Jyl ishinde oqyrmandarǵa ártúrli taqyryptaǵy 88 mln-nan astam materıal berildi.
2024 jylmen salystyrǵanda turaqty paıdalanýshylar sany 4,1% artyp, 5 539 969 adamǵa jetti. Oqyrmandar Túrkistan, Jambyl jáne Pavlodar oblystarynda kóp tirkelgen.
Kitap oqýǵa degen qyzyǵýshylyqtyń artýy kelýshiler sanynyń kóptiginen aıqyn baıqalady. Kitaphanalyq qyzmetke júginý kórsetkishi rekordtyq deńgeıge jetip, jalpy sany 57 mln ret kelý kórsetkishi tirkeldi. Sonymen qatar, merzimdi basylymdarǵa degen suranys kóp. Bir jyl ishinde QR Ulttyq kitaphanasyna gazetter men jýrnaldar boıynsha 1 mln-nan astam suranys tústi.
— Kitaphanalarǵa eń kóp kelýshiler — jastar. Almaty qalasyndaǵy Ulttyq kitaphanada oqyrmandardyń eń kóp bóligin 17–25 jas aralyǵyndaǵy jastar, odan keıin 12–18 jas aralyǵyndaǵy jasóspirimder quraıdy. Suranysqa ıe ádebıetterdiń qatarynda kórkem shyǵarmalar, tarıh pen etnografııaǵa arnalǵan basylymdar, ǵylymı-kópshilik, psıhologııalyq jáne medıtsınalyq kitaptar, sondaı-aq jańa tehnologııalar týraly basylymdar bar, — delingen habarlamada.
Kitaphanalar oqyrmandarmen jumys júrgizýmen qatar, mádenı ómirdiń mańyzdy ortalyǵy retinde de mańyzdy ról atqarady. Bir jyl ishinde kitaphanalarda 258 myńnan astam mádenı-aǵartýshylyq is-shara ótti.
Sonymen qatar ınfraqurylym men tsıfrlyq servısterdi damytý jumystary qatar júrgizilip jatyr. QR Ulttyq kitaphanasynda elektrondy resýrstar qoljetimdi bolý úshin ınterfeıs jańartyldy. Ulttyq akademııalyq kitaphana «Air Astana» áýe kompanııasymen birlesip «Áýe qanatynda» jobasyn júzege asyrdy. Al Shyǵys Qazaqstan oblysynda kitaphanashylardyń jumysyn ońtaılandyrý maqsatynda «DosAI» neıroassıstenti alǵash ret iske qosyldy.
Budan bólek, Sábıt Muqanov atyndaǵy Soltústik Qazaqstan oblystyq kitaphanasynda oqyrmandarǵa qyzmet kórsetý sapasyn arttyrýǵa jáne tsıfrlyq baılanysty kúsheıtýge baǵyttalǵan «AI Zhan» assıstenti engizildi.
Kitaphanalar jelisin damytý basqa óńirlerde de jalǵasyn tapty. Qyzylorda oblysynda «Rýhanııat» ortalyǵy paıdalanýǵa berilse, Batys Qazaqstan oblysynda 25 aýyldyq kitaphanany jańǵyrtýǵa arnalǵan pılottyq joba júzege asty. Bul bastamalardyń barlyǵy kitaphanany oqyrmanǵa jaqyndatyp, zamanaýı mádenı-aǵartýshylyq ortalyqqa aınaldyrýdy maqsat etedi.
Osyǵan deıin Astanada 11 jastaǵy oqýshy tórt tilde 853 kitap oqyǵanyn jazǵan edik.