Kitaphanalardyń tabysyn arttyrýǵa múmkindik bar – mınıstrlik

ASTANA. KAZINFORM — Mádenıet mekemeleri aqyly qyzmetter arqyly saladaǵy mamandardy yntalandyrý tetigin damytýǵa bolady. Bul týraly Mádenıet jáne aqparat mınıstrligi málim etti. 

Atap aıtqanda, «Mádenıet týraly» zańǵa kitaphana qoryn saqtaý jáne damytý máseleleri boıynsha ákimdikterdiń ókilettigin keńeıtetin ózgerister engizildi. Kitaphanalarǵa da óz ǵımarattaryn paıdalana otyryp, oqý-bilim jáne mádenı sharalar uıymdastyrý men ótkizý qyzmeti berildi.

— Bul qadam kitaphananyń damýyn yntalandyrady dep sanaımyz. Kitaphanalardyń 99%-y jergilikti atqarýshy organdarynyń qaramaǵynda. Buǵan mádenıet salasyndaǵy 4 000-ǵa jýyq kitaphana jáne bilim berý salasyndaǵy 8 000-nan astam kitaphana kiredi. Oblystyq jáne aýdandyq deńgeıdegi atqarýshy organdarǵa kitaphana qoryn damytý jáne saqtaý ókilettigin berý — aıtarlyqtaı múmkindikterge jol ashady, - delingen mınıstrliktiń Kazinform agenttigine bergen jaýabynda.

Vedomstvonyń aqparatyna qaraǵanda, memlekettik kitaphanalarǵa ǵımarattaryn paıdalana otyryp, is-sharalarǵa aqyly qyzmetter kórsetý quqyǵyn berý tártibi kitaphanalardy qoldaýǵa jaqsy múmkindik. 

— Bul qyzmetterden túsken qarajat kitaphananyń ózinde qalady. Osy oraıda olar ózderiniń shyǵyndaryn jabýǵa múmkindik alady, - dep atalyp ótken mınıstrlik málimetinde. 

Aıta keteıik, bıyl shilde aıynda memlekettik kitaphanalar men mýzeılerdiń aqyly qyzmet kórsetý qaǵıdalary jańartyldy.