Kitaphanalardy jańǵyrtý: BQO-da alǵashqy «Jaña klub» qaýymdastyq ortalyqtary ashyldy
ORAL. KAZINFORM – Prezıdent Qasym-Jomart Toqaevtyń tapsyrmasymen elimizde 23 sáýir Ulttyq kitap kúni bolyp belgilendi. Bul – mereke oqyrman mádenıetin damytýǵa jáne jastarǵa kitapqa degen súıispenshilikti arttyrýǵa baǵyttalǵan mańyzdy qadam.
16 jeltoqsan – Táýelsizdik kúninde Batys Qazaqstan oblysynda jańartylǵan kitaphanalar – qaýymdastyq ortalyqtary saltanatty túrde ashyldy. Joba aıasynda Baıterek aýdanynyń Peremetnoe jáne Darııan aýyldarynda alǵashqy «Jaña klub» ortalyqtary tanystyryldy.
Ashylý saltanatyna Batys Qazaqstan oblysynyń ákimi Narıman Tóreǵalıev, «Qazaqstan halqyna» qoǵamdyq qorynyń tóraǵa orynbasary Lázzat Chınkısbaeva, qordyń basqarma múshesi Sofııa Aısagalıeva, «TANA» qoǵamdyq qorynyń negizin qalaýshy Kamıla Luqpanova, sondaı-aq jergilikti qoǵam ókilderi men balalar qatysty. Sharada aýyldyq qaýymdastyqtar úshin osyndaı jobalardyń mańyzdylyǵy erekshe atap ótildi.
«Qazaqstan halqyna» qory, Batys Qazaqstan oblysy ákimdigi jáne «TANA» qory júzege asyryp otyrǵan qaıyrymdylyq jobasy aıasynda oblystaǵy 356 kitaphananyń ishinen 25-i jańartylyp, qaýymdastyq ortalyqtaryna aınaldyrylatyn bolady. Bul jobamen 130 myńnan astam turǵyn qamtylady.
Ár ortalyqtyń kitap qory 68 mıllıon teńgeden astam qarajatqa satyp alynǵan 800-den asa jańa kitappen tolyqtyrylady. Olardyń ishinde qazaqstandyq jáne sheteldik avtorlardyń úzdik týyndylary bar.
Oblys ákimdigi ortalyqtardy jóndeýden ótkizip, jalpy aýdany 680 sharshy metr ǵımarattardy jańartty. Peremetnoe jáne Darııan aýyldaryndaǵy eki ortalyqty abattandyrýǵa 43 345 000 teńge bólindi.
Qaýymdastyq ortalyqtary zamanaýı mýzykalyq aspaptarmen, ústel oıyndarymen, tigin jáne qolóner jabdyqtarymen qamtamasyz etilgen. Jergilikti turǵyndarǵa zamanaýı tehnologııalarmen qatar, bilim berý jáne mádenı is-sharalarǵa arnalǵan alańdar qoljetimdi.
Ortalyqtar jergilikti turǵyndardyń súıikti ornyna aınalyp otyr. Jańa klýbtar ashyldy: «Jamylǵan kók jelegin jumaq meken» ólketaný klýby, «Abaıtaný», áıelderge arnalǵan «Syrǵaǵlym» klýby jáne erekshe qajettilikteri bar adamdarǵa arnalǵan «Kúnshýaq» klýby.
Batys Qazaqstan oblysy elimizde alǵash ret eski kitaphanalardy zamanaýı qaýymdastyq ortalyqtaryna aınaldyrdy. Oblys ákimi Narıman Tóreǵalıev kitaphanalardy jańǵyrtý jastardyń shyǵarmashylyq qabiletterin damytý úshin mańyzdy serpin bolatynyn atap ótti.
- Memleket basshysy jastardy qoldaýǵa jáne mádenıetti damytýǵa erekshe kóńil bóledi. Osy maqsatta oblysymyzda birneshe joba júzege asyrylyp jatyr. Solardyń biri - kitaphanalardy jańǵyrtý. Bizdiń óńirdegi kitaphanalardy modernızatsııalaý men olardy qaýymdastyq ortalyqtaryna aınaldyrýdy «Qazaqstan halqyna» qory qarjylandyrdy. Sonymen qatar «TANA» qoǵamdyq qory oqyrmandar úshin zamanaýı tehnologııalarmen jabdyqtalǵan jaıly orta qurdy. Munda jastarymyz jańa bilim alyp, shyǵarmashylyq qabiletterin damytyp, jańa ıdeıalaryn júzege asyra alady, - dep atap ótti Batys Qazaqstan oblysynyń ákimi Narıman Tóreǵalıev.
2025 jyldyń sońyna deıin 9 myń sharshy metr kitaphana ǵımarattary qaıta jańǵyrtylady, 100-den astam kitaphanashy qaıta daıarlaýdan ótedi. «Qazaqstan halqyna» qory kitaphanalardy jabdyqtaýǵa jáne kitap qoryn jańartýǵa 797 mıllıon teńge bóledi. Peremetnoe jáne Darııan aýyldaryndaǵy kitaphanalardy jabdyqtaýǵa bıýdjet 34 mıllıon teńge boldy.
- Joba aýyl kitaphanalaryn zamanaýı qaýymdastyq ortalyqtaryna aınaldyrýǵa, olardyń dástúrli fýnktsııalaryn saqtaı otyryp, mádenı baǵdarlamalaryn baıytýǵa jáne barlyq jastaǵy turǵyndarǵa arnalǵan tartymdy ortalyqtar qurýǵa baǵyttalǵan. Biz úshin bul jobaǵa turǵyndardyń ózderi de «asar» dástúri boıynsha qatysqany óte mańyzdy, – dep atap ótti «Qazaqstan halqyna» qory basqarma tóraǵasynyń orynbasary Lázzat Chınkısbaeva.
«TANA» qory mádenıet, bilim jáne turaqty damý salalarynda jumys isteıdi. Uıym kitaphanalardy qoldaý, bilim berý bastamalary men mádenı murany saqtaý boıynsha jobalardy júzege asyrady. Qordyń basty maqsaty - jergilikti qaýymdastyqtardyń ómir súrý sapasyn jaqsartý.
- Aýyl kitaphanalaryn jańǵyrtý – bul bolashaqqa jasalǵan qadam. Biz ár turǵyn, jasynan kárisine deıin, zamanaýı tehnologııalar men bilimge, mádenıetke qol jetkizý úshin zamanaýı keńistikter jasaımyz. Kitaphanalar suranysqa ıe qoǵamdyq oryndarǵa aınalyp, ár adam úshin bilimnen bastap shyǵarmashylyq múmkindikterge deıin qundy nárse usynady. Biz bul jobany Qazaqstannyń basqa aımaqtarynda jalǵastyrýdy kózdep otyrmyz jáne árqashan tabysty yntymaqtastyqqa ashyqpyz, - dedi «TANA» qorynyń negizin qalaýshy Kamıla Luqpanova.
Jaqyn arada kitaphanashylardy jetekshi oqý oryndarymen seriktestik aıasynda oqytý josparlanyp otyr. Jańartylǵan qaýymdastyq ortalyqtary – aýyldyq qaýymdastyqtardy turaqty damytýǵa baǵyttalǵan mańyzdy qadam. Bul adamdardyń óz týǵan jerinde qalyp, mádenıetke, bilimge jáne tehnologııalarǵa qol jetkizýine múmkindik beredi.