Kitaphanalardy memlekettik tildegi zamanaýı ádebıettermen tolyqtyrý qajet — depýtat
ASTANA. KAZINFORM — Aýyldardaǵy kitaphana qoryn jańartý qajet. Bul týraly Quryltaıdyń jalpy otyrysynda depýtat «Aýyl» partııasy fraktsııasynyń múshesi Dınara Raıhanova málim etti.
— Elimizde kitaphana ınfraqurylymynyń qazirgi jaǵdaıy áli de jańǵyrtýdy qajet etedi. Ulttyq statıstıka bıýrosynyń derekterine sáıkes, 3912 kitaphananyń 85 paıyzy aýyldyq jerde ornalasqan. Alaıda sońǵy 15 jylda kitaphana jelisi tórtten birge qysqarǵan. Kitaphanalar — turǵyndar úshin mańyzdy mádenı jáne aqparattyq ortalyq. Aýyl kitaphanalarynda jylyna 25 mıllıondaı kelýshi tirkelgen. Bul kitaphanalarǵa degen suranystyń turaqtylyǵyn kórsetedi. Degenmen, birqatar nysan qarjylyq qysqartý kezinde jabylý qaýpinde tur. Sonymen qatar, kitaphanalardy jańǵyrtý olardyń materıaldyq-tehnıkalyq bazasyn nyǵaıtýdy da talap etedi. Máselen, barlyq kitaphananyń tek 59 paıyzy ǵana ınternetke qosylǵan, 32 kitaphana kúrdeli jóndeýdi qajet etedi, 17-si jylytylmaıtyn ǵımarattarda ornalasqan, 12-si apatty jaǵdaıda, — dedi Dınara Raıhanova Mádenıet jáne aqparat mınıstriniń atyna joldaǵan depýtattyq saýalynda.
Osy oraıda ol aýyl kitaphana qorlary eskirgenin atap ótti. Kóptegen kitaphana ǵımarattary qyzmet kórsetýge jáne zamanaýı talaptarǵa sáıkes kelmeıdi. Kitaphanalarda buqaralyq is-sharalar, kovorkıng, klýbtar men úıirmeler ótkizýge arnalǵan oryndar az.
— «Kitaphana jáne kitap shyǵarý isi týraly» jańa zań jobasyna jergilikti turǵyndardyń pikiri men kelisimin eskermeı aýyldyq kitaphanalardy jabýǵa nemese qaıta uıymdastyrýǵa tyıym salatyn normany qosýdy usynamyz.
Budan bólek, kitap qoryn tolyqtyrý máselesin qaıta qarap, oqyrmandar úshin memlekettik tildegi zamanaýı tanymdyq jáne klassıkalyq ádebıettermen qamtý mehanızmin qarastyrý kerek, — dedi depýtat.
Buǵan deıin habarlanǵandaı, elimizde biryńǵaı ulttyq elektrondy kitaphana qurylady.
