Elde kitaphanalarǵa kelýshiler sany 57 mıllıonǵa jetti
ASTANA.KAZINFORM — Búginde Qazaqstandaǵy kitaphanalar jańa damý kezeńine aıaq basty. Kelýshiler sanynyń artýy, oqyrmandar qatarynyń kóbeıýi jáne kitapqa degen suranystyń joǵary bolýy qoǵamda oqý mádenıetine degen yqylastyń kúsheıgenin kórsetedi.
Memleket basshysy kitap oqý mádenıetin damytýǵa aıryqsha mán berip otyr. Prezıdent kitaptyń zııatker, oıly ári progressıvti ult qalyptastyrýdaǵy róli erekshe ekenin birneshe ret atap ótken bolatyn.
— Qazirgi ýaqytta kitaphanalar elimizdegi eń kóp baratyn mádenıet mekemeleriniń qatarynda. Sońǵy derekter boıynsha kitaphanalarǵa kelýshiler sany 57 mıllıonǵa jetti. Paıdalanýshylar qatary 5,3 mıllıonnan 5,5 mıllıon adamǵa deıin kóbeıdi. Al oqyrmandarǵa berilgen kitap kólemi 85,7 mıllıonnan 88,9 mıllıon danaǵa ulǵaıdy. Bul kórsetkishter qoǵamda kitapqa degen qyzyǵýshylyqtyń saqtalyp qana qoımaı, turaqty túrde artyp otyrǵanyn aıǵaqtaıdy.
Kitaphanalardy ásirese 17 men 25 jas aralyǵyndaǵy jastar belsendi paıdalanady. Kórkem ádebıetke, qazaq klassıkasyna, tarıh, etnografııa, psıhologııa, jańa tehnologııalar jáne ǵylymı-kópshilik baǵyttaǵy basylymdarǵa suranys joǵary. Sońǵy bir jyldyń ózinde balalar ádebıetine qyzyǵýshylyq 75 paıyzǵa ósti. Al qazaq klassıkasy men qazaq tiline aýdarylǵan shetel ádebıetine degen suranys 50 paıyzǵa artty, — delingen mınıstrlik habarlamasynda.
Dástúrli qyzmet túrlerimen qatar tsıfrlyq kitaphana servısteri de qarqyndy damýda. Kitaphanalar avtomattandyrylǵan júıelerge kóship, elektrondy katalogtaryn keńeıtýde. Jasandy ıntellektke negizdelgen sheshimder engizilip, kitap qoryna qashyqtan qol jetkizý múmkindigi arta tústi. Elektrondy kitaphana resýrstaryn paıdalanýshylar sany 30 paıyzǵa ósip, 718 myń adamǵa jetti. Jalpy keıingi 5 jylda onlaın oqyrmandar sany 4 mıllıonnan asty, al elektrondy formattaǵy kitaptardy qaraý kórsetkishi 9 mıllıonnan joǵary boldy.
Búginde kitaphanalar ár býyn ókilin toǵystyratyn rýhanı jáne tanymdyq ortaǵa aınaldy. Munda mádenı-aǵartýshylyq is-sharalar, avtorlarmen kezdesýler, kitap kórmeleri, bilim berý jobalary men zııatkerlik klýbtar turaqty túrde uıymdastyrylady. 2025 jyly elimizdiń kitaphanalarynda 250 myńnan astam is-shara ótti.
— Sonymen qatar elimizde kitaphanalar salý jáne olardy jańǵyrtý jumystary jalǵasyp jatyr. Astana, Almaty jáne Qyzylorda qalalarynda jańa Prezıdent kitaphanalaryn salý josparlanǵan. Búginge deıin qalalyq jáne aýyldyq 36 kitaphana jańǵyrtyldy. 2026 jyly taǵy 30 kitaphanany jańartý kózdelip otyr, — delingen habarlamada.
Aıta ketelik Pavlodarda toqyraý jyldary 5 myń kitapty saqtap qalǵan kitaphanashy týraly jazǵan edik.
