Kitaphanada jańa kitap qalmady: astanalyq oqýshy 800 kitap oqyǵan
ASTANA. KAZINFORM — Elordadaǵy 9-synyp oqýshysy Veronıka Anısımova Astananyń № 8 balalar kitaphanasyndaǵy 800 kitapty oqyp, ondaǵy kitap qorynyń basym bóligin paraqtaǵan, dep habarlaıdy elorda ákimdiginiń resmı saıty.
Veronıkanyń kitapqa degen qyzyǵýshylyǵy bir shyǵarmadan bastalǵan. Úshinshi synypqa deıin kitap oqýǵa asa qyzyqpaǵan oqýshyǵa tanystarynyń biri otbasysyna Pamela Trevers jazǵan «Merı Poppıns» povesin bergen. Kitap qyz balaǵa qatty áser etip, araǵa jarty jyl salyp anasymen birge № 8 balalar kitaphanasynyń janynan ótip bara jatqanda, shyǵarmanyń jalǵasyn izdeý úshin ishine kiredi. Osylaısha onyń kitap oqýǵa degen qyzyǵýshylyǵy bastalǵan.
— Buryn kitap oqýdy múlde unatpaıtynmyn. Úshinshi synypta «Merı Poppınsti» oqyǵannan keıin kitapqa qatty qyzyǵyp kettim. Kóbine demalys kúnderi keshke kitaphanaǵa anammen birge baramyn. Kitaptardy alyp, úıge qaıtamyz. Men olardy úıimde jáne mektepte oqımyn, — dedi Veronıka Anısımova.
№ 8 kitaphanaǵa turaqty baryp júrgen jyldar ishinde 9-synyp oqýshysy ondaǵy oqýǵa bolatyn shyǵarmalardyń barlyǵyn derlik oqyp shyqqan. Veronıka oqyǵan kitaptarynyń arnaıy tizimin júrgizbegen. Oqyǵan shyǵarmalarynyń sany kóp ekenin kitaphana sórelerinen ózine tanys emes jańa kitaptardy tappaı qalǵan kezde ǵana ańǵarǵan.
— Men oqyǵan kitaptarymdy eshqashan sanap kórgen emespin. Biraq súıikti kitaphanamda oqıtyn jańa kitap qalmaǵanynyń ózi kóp nárseni ańǵartady. Men kitaptyń sanyna asa mán bermeımin, óıtkeni men úshin onyń sapasy mańyzdy. Naqty bir súıikti kitabym da joq. Sebebi ár kitap ártúrli áser men emotsııa syılaıdy jáne árqaısysynyń ózindik ereksheligi bar, — dedi mektep oqýshysy.
Qazir Veronıka orys jáne shetel klassıkterin oqýǵa basymdyq beredi. Gogol, Chehov jáne Dostoevskııdiń shyǵarmalaryn súıip oqıdy.
— Maǵan kitap oqyǵan unaıdy, óıtkeni bul — qyzyqty ári erekshe oqıǵalarǵa toly basqa álemge enip ketkendeı áser beredi. Kitap arqyly aınalamdaǵy álemdi de, ózimdi de tanyp-bilemin. Maǵan adamdar men olardyń taǵdyry týraly shyǵarmalardy oqý erekshe unaıdy. Ásirese Chehovtyń shyǵarmalaryn jaqsy kóremin. Onyń tili qarapaıym ári satıralyq áńgimeleriniń sıýjetteri qyzyqty, — deıdi oqý ozaty.
Veronıka kitaptaryn sabaqqa da ózimen birge alyp baryp, sabaq bastalǵanǵa deıin oqıtynyn tilge tıek etti.
Kitap oqýdan bólek, mektep oqýshysy shyǵarmashylyqqa da qyzyǵady. Ol sýret salýdy, qolónermen aınalysýdy, toqýdy, bıser toqýdy jáne makrame jasaýdy unatady. Bolashaqta Veronıka ómirin naqty ǵylymdarmen baılanystyryp, matematıka pániniń muǵalimi bolýdy josparlap otyr.
Budan buryn Qazaqstan halyqaralyq kitap baıqaýynda toǵyz júldeli orynǵa ıe bolǵanyn jazǵanbyz.
