Kitaphana salasy da zaman kóshinen qalǵan joq – Nurjan Joldybalınov
ASTANA. KAZINFORM – 24 qazan – kitaphanashylar kúni. Ataýly kún qarsańynda kitaphana, arhıv jáne kitap isin damytý baǵytynda atqarylyp jatqan aýqymdy jumystar jóninde QR Ulttyq akademııalyq kitaphana Basshynyń orynbasary Nurjan Joldybalınov aıtyp berdi.
Ol áńgime barysynda Ulttyq akademııalyq kitaphanada eńbek etkenine 20 jylǵa jýyqtaǵanyn atap ótti.
– Men osy kitaphanaǵa 20 jasymda kelgenmin. Sodan beri zý etip 20 jyl óte shyqty. Árıne, birden bastyq bolyp kelgen joqpyn. Eń birinshi kelgende 2007 jylǵy Aqparattyq keńistikti tereńdetý baǵdarlamasy aıasynda elektrondyq kitaphana qurylǵan. Sol jerde kitaptardy sandyq nusqaǵa túsirýden bastaǵanmyn, - deıdi Nurjan Joldybalınov.
Kitaphana salasynyń mamany tehnologııa túrlenip, zaman ýaqyt saıyn ózgergen tusta, kitaphanashylardyń qyzmeti de qaryshtap damyp kele jatqanyn aıtady.
– Kitaphana salasy da zaman kóshinen qalǵan joq. Jasandy ıntellektini belsendi túrde qoldanyp jatyrmyz. Ár kitaphananyń ishinde AІdos dep atalatyn assıstent jasap jatyrmyz. Testileý rejıminen ótti. Kitaphanaǵa kelgen oqyrman vırtýaldy kitaphanashymen sóılesip turǵandaı óziniń taqyrybyn aıtady. Qandaı maqsatpen kelgenin bizde ol qujattar bolsa, birden oqyrmanǵa usyna beredi, - deıdi ol.
Nurjan Joldybalınovtyń sózinshe, qazir kitaphanashy bolǵysy keletin jastardyń qatary kóbeıgen. Ol tájirıbe alý úshin keletin stýdentter birden kitaphanada qalǵysy keletinin aıtady.
– Orta bilimdi bitirip, kitaphana salasyna túseıin degenmin dep keletin oqýshylar óte kóp. Kóbinde qaı jaqtan bilim alýǵa bolatynyn surap keledi. Biz aqyl-keńesimizdi aıtyp, baǵyt kórsetemiz. Kelýshiler arasynda qaz balalarmen qatar, jigitter de bar. Biraq, barlyǵy jalaqyǵa kelip tireledi. Bul endi ýaqyttyń enshisindegi sharýa, - deıdi kitaphanashy.
Búginde respýblıka boıynsha 236 arhıv mekemesi jumys isteıdi. Ulttyq arhıv qorynda 74,5 myń qordy qamtıtyn 27 mıllıonnan astam saqtaý birligi bar. Bilikti mamandar daıarlaý maqsatynda «Kitaphana isi, aqparatty óńdeý jáne arhıv isi» baǵyty boıynsha memlekettik bilim berý tapsyrysy eki ese ósti — bakalavrıat boıynsha grant sany 20-dan 100-ge deıin kóbeıdi.
2025 jyly elimizde jalpy qoljetimdi kitaphanalar jelisi 3 883 kitaphanaǵa jetti, olardyń kitap qory — 72 283 946 dana. Respýblıka boıynsha kitaphanalarǵa oqyrmandardyń kelý sany — 51 mln adam.