Kitap oqýdy qoldaıtyndarǵa arnalǵan jańa marafon baǵyty ashyldy
ASTANA. KAZINFORM — Elde «Kitap oqıtyn ult» respýblıkalyq oqý marafony aıasynda arnaıy konkýrstan tys Parasat baǵytyna tirkelý bastaldy, dep habarlaıdy elorda ákimdiginiń resmı saıty.
Endi marafonǵa júlde men oryn úshin básekege túspeı-aq, jeke úlgisi arqyly oqý mádenıetin qoldaǵysy keletin kez kelgen adam qatysa alady.
Negizgi marafon jarys formatynda ótedi. Alaıda tájirıbe kórsetkendeı, «Kitap oqıtyn ult» qozǵalysyna qosylǵysy keletin, biraq básekege túsip, júlde úshin talasýǵa nıeti joq adamdar da kóp. Osy azamattar úshin Parasat baǵyty quryldy.
Jańa baǵyt kitap oqýdy jeke damýynyń mańyzdy bóligi dep sanaıtyn jáne bul ıdeıany kópshilik aldynda qoldaýǵa daıyn adamdardy biriktiredi. Oǵan memlekettik organdardyń ókilderi, depýtattar, ǵalymdar, mádenıet jáne óner qaıratkerleri, kásipkerler, qoǵam belsendileri, kásibı qaýymdastyq ókilderi, sondaı-aq Qazaqstan azamattary men shetelde turatyn qandastar qatysa alady.
Sonymen qatar Parasat baǵyty barshaǵa ashyq. Qatysýshynyń kásibi, qyzmeti, turǵylyqty jeri men azamattyǵyna shekteý qoıylmaıdy.
— «Kitap oqıtyn ult» — tek baıqaý nemese júldeli oryndar úshin kúres emes. Bul, eń aldymen, kitap oqýdy qoǵamnyń kúndelikti mádenıetiniń bir bóligine aınaldyrý ıdeıasy. Parasat baǵyty osy ıdeıany jeke úlgi arqyly qoldaýǵa múmkindik beredi: kitap oqý, óz oıymen bólisý jáne oqý mádenıetiniń áleýmettik mártebe men mamandyqqa qaramastan adamdardy biriktiretinin kórsetý, — deıdi marafon uıymdastyrýshylary.
Parasat qatysýshylary respýblıkalyq marafonnyń biryńǵaı tizimine engen 15 shyǵarmany oqýy tıis. Tizimge qazaq jáne orys tilderindegi kitaptar engizilgen.
Ár kitapty oqyp bolǵan soń qatysýshy jeke kabınetinde qysqasha pikir qaldyryp, shyǵarma týraly óz oıy men áserin bólisýi qajet.
Qorytyndy kezeńde barlyq 15 shyǵarma boıynsha onlaın-testileý ótkiziledi. Ol qatysýshynyń kitaptardy oqyǵanyn rastaýǵa múmkindik beredi.
Parasat baǵytyna tirkelý ashyq jáne 2026 jylǵy 30 qazanǵa deıin jalǵasady.
Buǵan deıin «Kitap oqıtyn ult» jobasyna eki aptada mıllıonnan astam adam tirkelgenin jazǵanbyz.
