Kitap oqıtyn ult jobasy: 6 aıda 2 mıllıon kitap oqyldy
ASTANA. KAZINFORM – «Kitap oqıtyn ult» jobasyna 189 myń adam qatysqan. Olar alty aıdyń ishinde, 2 mıllıonnan astam kitap oqydy. Bul týraly «Kitap oqıtyn ult» qoǵamdyq qorynyń atqarýshy dırektory Aıan Sakoshev Jibek Joly arnasyndaǵy «Búgin live» baǵdarlamasyna bergen suhbatynda málimdedi.
Qaraǵandy, Qostanaı oblystary men Shymkent qalasynda bastaý alǵan qanatqaqty joba myńdaǵan adamnyń kitap oqýǵa degen qyzyǵýshylyǵyn arttyrǵan.
Statıstıkaǵa sáıkes, qazaqstandyqtar jylyna orta eseppen 2–3 kitap oqıdy. Al jobaǵa qatysýshylar alty aıdyń ishinde bul kórsetkishti bes ese ulǵaıtty. Kópshilik kún saıyn 30–50 bet oqýdy turaqty ádetke aınaldyrǵan.
- Jobanyń negizgi maqsaty – elimizde turaqty kitap oqý mádenıetin qalyptastyrý. Bastama Qasym-Jomart Toqaevtyń úshinshi Ulttyq quryltaıda aıtqan ıdeıasynan týyndady. Memleket basshysy jastar arasynda kitap oqý mádenıetin damytý qajettigin naqty atap ótken bolatyn. Osy úndeýdi negizge ala otyryp, qoǵamdyq jobalarmen aınalysyp júrgen azamattar birigip, atalǵan jobany iske qostyq. Kitap oqý – adamnyń oı-órisin keńeıtip, mı qyzmetin shyńdaıtyn eń tıimdi quraldyń biri. Sondyqtan sanany turaqty túrde damytyp otyrý qajet. Onyń eń qarapaıym ári qoljetimdi joly – kitap oqý, - dedi Aıan Sakoshev.
Spıkerdiń aıtýynsha, «Kitap oqıtyn ult» jobasy 2025 jyldyń qyrkúıek aıynda bastalǵan. Joba alty baǵyt boıynsha ár túrli aýdıtorııany qamtyǵan. Qatysýshylardyń jas ereksheligine sáıkes ár oqyrmanǵa 15 kitaptan bekitildi, olardy oqyp bitý osy jyldyń sáýir aıyna deıin josparlanǵan.
- Ár jas ereksheligine sáıkes kitaptar tizimi arnaıy sarapshylyq toptyń qatysýymen jasaqtaldy. Máselen, 6-synyp oqýshylaryna 15 kitaptan turatyn jeke tizim usynyldy. Stýdentterge, memlekettik qyzmetkerlerge jáne ózge de qatysýshylarǵa bólek-bólek irikteý júrgizildi. Tizimge ulttyq ádebıetimizdiń tańdaýly týyndylary, álemdik bestsellerler jáne túrli janrdaǵy tanymdyq eńbekter engizildi. Ár janr boıynsha qazaqstandyq oqyrmanǵa mańyzdy shyǵarmalar qamtyldy. Alty aı ishinde qatysýshylar 15 kitap oqyp shyqty. Endi yntalandyrý tetigi retinde arnaıy baıqaý uıymdastyrylady. Baıqaý debat, quiz formatynda ótýi múmkin. Qatysýshylar kitap mazmuny boıynsha daıyndalǵan suraqtarǵa jaýap berip, irikteýden ótedi, - dedi ol.
Joba jeńimpazdaryna arnaıy aqshalaı syılyqtar qarastyrylǵan: – І oryn – 1 000 000 teńge; ІІ oryn – 600 000 teńge; ІІІ oryn – 400 000 teńge.
- Bul – kitap oqýǵa degen yntany arttyrýǵa baǵyttalǵan naqty motıvatsııalyq qadam. Oqyrman bilim alyp qana qoımaı, qarjylaı qoldaýǵa da ıe bolady. Jobaǵa úsh óńirdegi mekemeler demeýshilik kórsetti. Qorytyndy nátıjeler sáýir aıynda, Ulttyq kitap kúni qarsańynda jarııalanady,- dedi ol.
Osy tusta Aıan Sakoshev aldaǵy jyldary jobanyń aýqymyn keńeıtý josparda bar ekenin málimdedi.
- Qazirgi tańda joba úsh óńirde pılottyq túrde júzege asyrylyp jatyr. Nátıjesi oń bolǵan jaǵdaıda, ony respýblıka kóleminde keńeıtý josparda bar. Eń bastysy – bul bastamaǵa qatysqan árbir azamat utylmaıdy: ol kitap oqıdy, bilimin arttyrady jáne eńbegi úshin syıaqy alýǵa múmkindik alady, - dedi Aıan Sakoshev.
Aıta keteıik, Astanada 11 jastaǵy oqýshy tórt tilde 853 kitap oqyǵan.
