«Kitap oqıtyn ult» marafonyna tirkelý jalǵasyp jatyr
ASTANA. KAZINFORM — Elimizde alǵashqy respýblıkalyq «Kitap oqıtyn ult» kitap oqý marafonyna tirkelý júrip jatyr. Jobaǵa mektep oqýshylarynan bastap stýdentter, ustazdar, memlekettik qyzmetshiler men tutas otbasylar qatysa alady. Bul týraly QR Mádenıet jáne aqparat mınıstrligi Arhıv, qujattama jáne kitap isi komıteti Kitap isi basqarmasynyń basshysy Almaz Myrzahmet habarlady.
Marafon qatysýshylardyń jasyna jáne áleýmettik sanatyna qaraı jeti baǵyt boıynsha uıymdastyrylady. Atap aıtqanda, «Kitap oqıtyn mektep» baǵytyna 6-10 synyp oqýshylary, «Kitap oqıtyn kolledjge» kolledj stýdentteri, «Kitap oqıtyn ýnıversıtetke» joǵary oqý oryndarynyń stýdentteri, «Kitap oqıtyn pedagog» baǵytyna mektep muǵalimderi men kolledj oqytýshylary qatysa alady. Al «Kitap oqıtyn áýlet» otbasylyq komandalarǵa, «Kitap oqıtyn memlekettik qyzmetshi» memlekettik qyzmetshilerge arnalǵan. Al «Kitap oqıtyn zııatker» baǵyty boıynsha jasyna jáne qyzmet salasyna shekteý qoıylmaıdy.
Qatysýshylarǵa ortaq talap — arnaıy iriktelgen kitaptardy oqý. Ár qatysýshy 330 kitaptan turatyn qordan 15 shyǵarma oqýy qajet.
— Onyń 165-i qazaq tilinde, 165-i orys tilinde usynylǵan. Tizimge otandyq avtorlardyń shyǵarmalary, álem klassıkasy jáne zamanaýı týyndylar endi. Kitaptardy irikteý kezinde jalpyulttyq daýys berý qorytyndysymen «100 kitap» tizimine engen shyǵarmalar men ádebıet salasyndaǵy Nobel syılyǵy laýreattarynyń týyndylaryn qosa alǵanda, álemdik bestsellerler de eskerildi, — dedi Almaz Myrzahmet Jibek Joly telearnasynyń «Búgin Live» baǵdarlamasynda.
Іriktelgen shyǵarmalardy oqý úshin qatysýshylarǵa birneshe aı ýaqyt beriledi. Marafonnyń negizgi oqý kezeńi bıyl qyrkúıekte bastalyp, 2027 jylǵy naýryzǵa deıin jalǵasady. Osy ýaqyt ishinde olar kitaptardy oqyp, jeke kabınetterinde shyǵarmalar týraly qysqasha pikirin jarııalap otyrady. Oqý kezeńi aıaqtalǵan soń qorytyndy testileý men zııatkerlik kvızder ótkiziledi.
Qatysýshylardyń bilimi men oqý nátıjeleri qorytyndy kezeńde saralanyp, jeńimpazdar anyqtalady. Óńirlik kezeńderdiń jeńimpazdary men júldegerlerine qarjylaı syılyqtar qarastyrylǵan.
— І orynǵa — 600 000 teńge, ІІ orynǵa — 450 000 teńge, ІІІ orynǵa — 300 000 teńge tabystalady. Barlyq fınalıst dıplomdarmen jáne elektrondy sertıfıkattarmen marapattalady, — dedi spıker.
Marafonnyń aýqymy bıyl keńeıip otyr. Joba Memleket basshysy Qasym-Jomart Toqaevtyń kitap oqý mádenıetin damytý jónindegi tapsyrmasyn júzege asyrý aıasynda qolǵa alynǵan. Negizgi maqsat — qazaqstandyqtardyń kitap oqýǵa qyzyǵýshylyǵyn arttyryp, eldi álemdegi eń kóp kitap oqıtyn on memlekettiń qataryna qosý.
Aıta keteıik, joba buǵan deıin Qostanaı jáne Qaraǵandy oblystarynda, sondaı-aq Shymkent qalasynda pılottyq rejımde ótkizilip, 189 myńǵa jýyq adamdy qamtyǵan. Endi marafonǵa 2 mıllıonǵa jýyq turǵyndy tartý josparlanyp otyr. Qazirdiń ózinde oǵan mıllıonnan asa adam qyzyǵýshylyq tanytqan.
Buǵan qosa jaqynda Nobel syılyǵynyń laýreaty, belgili qytaı jazýshysy Mo ıAn «Kitap oqıtyn ult» qatysýshylaryna úndeý joldap, qazaqstandyq oqyrmandarǵa shabyt tilegen edi.
