«Kitap oqıtyn ult» marafony: jeńimpazdar 600 000 teńge utyp alady

Astana ákimdiginiń málimetinshe joba elimizdiń barlyq óńirinen qatysýshylardyń basyn qosyp, kitap oqýdy nasıhattaý men kitap oqý mádenıetin damytýǵa baǵyttalǵan iri ulttyq bastamalardyń birine aınalady.

Marafon 2026 jyldyń qyrkúıeginen 2027 jyldyń sáýirine deıin qazaq jáne orys tilderindegi eki lıgada ótedi. Joba 7 baǵytty qamtıdy:
− «Kitap oqıtyn mektep» — 6-10 synyp oqýshylaryna arnalǵan;
− «Kitap oqıtyn kolledj» — kolledj stýdentterine arnalǵan;
− «Kitap oqıtyn ýnıversıtet» — joǵary oqý oryndarynyń stýdentterine arnalǵan;
− «Kitap oqıtyn pedagog» — mektep muǵalimderi men kolledj oqytýshylaryna arnalǵan;
− «Kitap oqıtyn áýlet» — otbasylyq komandalarǵa arnalǵan;
− «Kitap oqıtyn memlekettik qyzmetshi» — memlekettik qyzmetshilerge arnalǵan;
− «Kitap oqıtyn zııaly» — jasyna jáne qyzmet salasyna shekteý qoıylmaıtyn azamattarǵa arnalǵan.

Ár qatysýshy óz baǵyty boıynsha arnaıy jasaqtalǵan 330 kitaptan turatyn qordan 15 kitap oqýy kerek. Onyń 165-i qazaq tilinde, 165-i orys tilinde usynylady. Kitaptar tizimine otandyq avtorlardyń shyǵarmalary, álem klassıkasy jáne zamanaýı týyndylar engen. Tizimdi jasaqtaý kezinde jalpyulttyq daýys berý qorytyndysy boıynsha «100 kitap» tizimine engen shyǵarmalar, sondaı-aq ádebıet salasyndaǵy Nobel syılyǵynyń laýreattary jazǵan týyndylardy qosa alǵanda, álemdik bestsellerler de eskerilgen.

Marafonnyń negizgi oqý kezeńi bıyl qyrkúıekte bastalyp, 2027 jyldyń naýryzyna deıin jalǵasady. Qatysýshylar kitap oqyp, jeke kabınetinde olar týraly qysqasha pikirlerin jarııalaıdy. 2027 jyldyń naýryz-sáýir aılarynda qorytyndy testileý men zııatkerlik vıktorınalar ótedi.

Óńirlik kezeńderdiń jeńimpazdary men júldegerlerine aqshalaı syılyqtar tabystalady:
− 1-oryn — 600 000 teńge;
− 2-oryn — 450 000 teńge;
− 3-oryn — 300 000 teńge.
Barlyq fınalıst dıplomdarmen jáne elektrondy sertıfıkattarmen marapattalady.
«Kitap oqıtyn ult — Chıtaıýşaıa natsııa» qoǵamdyq qorynyń tóraǵasy Baqytjan Turlybekov jobanyń negizgi maqsaty baıqaýdyń ózimen ǵana shektelmeıtinin atap ótti.

— Búgin biz «Kitap oqıtyn ult» atty tuńǵysh respýblıkalyq marafonǵa tirkeý ashyp, osylaısha ártúrli jastaǵy, túrli mamandyq ıeleri men qyzyǵýshylyq tanytqandardy kitap tóńiregine toptastyratyn úlken jalpyulttyq qozǵalysqa jol ashyp otyrmyz.
Barshańyzdy marafonǵa qatysýǵa shaqyramyn. Birlese otyryp, kitap oqýdy Qazaqstandaǵy qazirgi ómirdiń mańyzdy bóligine aınaldyryp, kitap oqıtyn ulttyń — myqty, bilimdi ári oıly ult ekenin kórsete alamyz dep senemin, — dedi Baqytjan Turlybekov.

Qatysý tártibi, baǵyttar boıynsha erejeler men kitaptar tizimi jobanyń resmı saıtynda jarııalanǵan. 

Aıta ketelik kún saıyn 2 myńnan asa adam elorda kitaphanalaryna barady.