Kitap oqyǵan sottalǵandardyń jaza merzimi qysqarady — Ózbekstan zań jobasyn maquldady

TAShKENT. KAZINFORM — Ózbekstan parlamentiniń tómengi palatasy kitap oqyǵany úshin sottalǵandardyń jaza merzimin qysqartýdy kózdeıtin zań jobasyn maquldady, dep habarlaıdy Kazinform agenttiginiń menshikti tilshisi.

Іshki ister mınıstriniń orynbasary Ramazon Ashrapov túsindirgendeı, zań jobasy aıasynda Qylmystyq kodeks jańa bappen tolyǵady. Atap aıtqanda, 1 kitapty oqyp, sol eńbek boıynsha emtıhandy sátti tapsyrǵan azamattardyń jaza merzimin 3 kúnge qysqartý josparlanǵan.

Toqtala keteıik, atalǵan zań jobasyn usynǵan «Mıllıı tıklanısh» («Ulttyq jańǵyrý») partııasynyń aqparatyna saı, ádebıetter tizimin Respýblıkalyq rýhanııat jáne aǵartý ortalyǵy bekitedi.

Bul rette shekteý de bar, ıaǵnı sottalǵandar jylyna 10 kitaptan kóp shyǵarma oqyp, emtıhan tapsyra almaıdy. Sarapshylardyń paıymynsha, atalǵan bastama temir torǵa túskenderdi tıimdi ońaltýǵa yqpal etedi.

Endi atalǵan zań jobasy Senattyń qaraýyna engiziledi. Tıisti talqylaýdan suryptalyp shyqqan nusqa keıin qol qoıý úshin Ózbekstan prezıdentine joldanady.

Eske salaıyq, Ózbekstan úkimeti úı qamaqtaǵy jáne bas bostandyǵy shektelgen azamattardy baqylaýǵa arnalǵan elektrondy bilezikter óndirisin jolǵa qoıýǵa nıetti.