QSZI: JI kómegimen jasalǵan kontent mindetti túrde tańbalanýy tıis
ASTANA. KAZINFORM – Qazaqstannyń strategııalyq zertteýler ınstıtýty (QSZI) alańynda búgin saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylanyp jatyr.
Jıynda QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov JI kómegimen jasalǵan kontent mindetti túrde tańbalanýy tıis ekenin aıtty.
Mundaı talap shilde aıynda kúshine engen Tsıfrlyq kodekste bekitilgen eli. Osylaısha, Tsıfrlyq kodeks jasandy ıntellektini qoldanýǵa jańa múmkindiktermen qatar, naqty talaptar da engizdi.
– Sonyń biri – jasandy ıntellektiniń kómegimen jasalǵan kontentti mindetti túrde tańbalaý. Bul talapty saılaýaldy úgit kezinde jáne túrli aqparattyq naýqandarda eskerý qajet. Kontenttiń jasandy ıntellekt kómegimen ázirlengeni kórsetilýi kerek. Bul azamattardyń sanaly tańdaý jasaýyna jáne aqparattyń ashyqtyǵyn qamtamasyz etýge yqpal etedi, – dedi spıker.
Sondaı-aq ınstıtýt dırektory búgingi kezdesýdiń negizgi taqyryptaryna toqtaldy.
– Biz eshbir saıası partııany qoldamaımyz jáne úgit júrgizbeımiz. Bizdiń mindetimiz – saılaýaldy úderisterdi baqylap, taldaý jasap, olardyń damý úrdisterine saraptamalyq baǵa berý, – dedi ol.
Eske salaıyq, 23 tamyzdaǵy Quryltaı saılaýynda tirkelgen jerinde bolmaıtyn azamattar kez kelgen ýchaskede daýys bere alady.
