QSZI sarapshysy saılaýshylar tańdaýyna áser etetin negizgi faktorlardy atady
ASTANA. KAZINFORM — Qazaqstandyq saılaýshylar partııany tańdaǵanda eń áýeli senimge, partııanyń tanymaldyǵyna jáne eldiń bolashaǵyna qatysty ustanymyna mán beredi. Bul týraly QR Prezıdenti janyndaǵy Qazaqstannyń strategııalyq zertteýler ınstıtýtynyń bas ǵylymı qyzmetkeri Aıgúl Zabırova «SAILAÝ-2026: medıa jáne tsıfrlyq platformalar» sarapshylar alańynda aıtty.
Onyń sózinshe, qazirgi tańda elektoraldyq tańdaýda ıdeologııalyq aıyrmashylyqtar burynǵydaı sheshýshi ról atqarmaıdy.
— Búginde saılaýshylardyń tańdaýyna eń áýeli partııaǵa degen senim, onyń tanymaldyǵy jáne eldiń bolashaǵyna qatysty ustanymy yqpal etedi, — dedi ol.
Sonymen qosa sarapshy QSZI júrgizgen áleýmettik saýalnama nátıjesine sáıkes, qazaqstandyqtardyń basym bóligi saılaýǵa qatysýǵa daıyn ekenin aıtty. Azamattardyń úshten ekisi naqty bir saıası partııaǵa daýys berýge nıetti.
— Saýalnamaǵa qatysqandardyń jartysy eldegi turaqtylyq pen qoǵamdyq tártiptiń saqtalýyn mańyzdy dep sanaıdy. Respondentterdiń 38%-y saıası partııalardan azamattardyń máselelerin naqty sheshýdi kútse, 26%-y partııa ókilderiniń halyqpen kezdesýler ótkizip, jeke qabyldaýlar arqyly tikeleı baılanys ornatýyn mańyzdy dep esepteıdi, — dedi spıker.
Aıgúl Zabırovanyӊ aıtýynsha, zertteý qazaqstandyqtar arasynda qoǵamdyq optımızmniń joǵary ekenin de kórsetti. Saýalnamaǵa qatysqandardyń shamamen tórtten úshi bir jyldan keıin óz ómiri jaqsarady dep kútedi. Onyń pikirinshe, qoǵam senimin saqtaý jáne azamattardyń suranysyna der kezinde jaýap berý eldegi elektoraldyq júıeniń odan ári damýyna yqpal etedi.
Buǵan deıin Qazaqstannyń strategııalyq zertteýler ınstıtýtynyń bas ǵylymı qyzmetkeri respondentterdiń tórtten úshi Quryltaı depýtattarynyń saılaýyna qatysýǵa daıyn ekeni aıtqan edi.
