QSZI: Prezıdent Joldaýy - júzege asyrylyp jatqan reformalardyń zańdy jalǵasy

ASTANA. QazAqparat - El Prezıdentiniń búgingi Joldaýy - Qazaqstanda osy ýaqytqa deıin júzege asyrylyp jatqan reformalardyń zańdy jalǵasy. Elbasy Joldaýy týraly QR Prezıdenti janyndaǵy Qazaqstan strategııalyq zertteýler ınstıtýtynyń áleýmettik-ekonomıkalyq zertteý ortalyǵynyń jetekshisi Lázzat Nurqatova osylaı pikirin bildirdi, dep habarlaıdy «QazAqparat» HAA tilshisi.

«Meniń oıymsha, Qazaqstan Prezıdentiniń Joldaýyn buryn da belgilengen reformalardyń, atap aıtqanda «Ult Jospary: 100 naqty qadam», «Tsıfrly Qazaqstan» baǵdarlamalarynyń zańdy jalǵasy dep aıtýǵa ábden bolady», - deıdi Lázzat Nurqatova.

Sarapshy sonymen birge, Memleket basshysy óz Joldaýynda kún tártibinde turǵan 10 mindetti belgilep bergenin atap ótti.

«Men agroónerkásip kesheni men kólik-logıstıkalyq keshenniń damýyna erekshe nazara aýdarar edim. Bul baǵyttar halyqtyń jumyspen qamtylýyna jáne ekonomıkanyń damýyna erekshe serpin beredi. Sonymen birge, Memleket basshysy bank sektorynyń qaıta jańǵyrtylýyn esepke alýdy qadap aıtty. Demek, halyqqa qarjylyq qyzmet qalaı kórsetilip jatqanyna búgingi tańda mańyz berýimiz kerek. Prezıdent sondaı-aq, qarapaıym azamattardyń qajettiligi úshin nesıelik baǵdarlamalardy keńeıtýdi tapsyrdy. Buǵan qosa áleýmettik saıasat pen adamı kapıtalǵa da erekshe den qoıyp otyr», - deıdi Lázzat Nurqatova.

Onyń aıtýyna qaraǵanda, QR Prezıdenti tórtinshi ónerkásiptik revolıýtsııa jaǵdaıynda álemdik tehnologııalar kóshinen Qazaqstannyń qalmaýyna basa mańyz bergenin erekshe aıta ketken durys.

«Barlyq bilim baǵdarlamalary men muǵalimderdiń mártebesin arttyrýdy qarastyrý kerek. Búgingi kúni muǵalimderdiń aılyǵy tómen ekeni eshkimge qupııa emes. Memleket basshysy óz Joldaýynda 2016-2017 jyly muǵalimderdiń, dárigerlerdiń, memlekettik qyzmetkerlerge beriletin áleýmettik kómektiń úsh esege kóbeıtilgenin, sonymen qatar zeınetaqy mólsheri artatynyn tilge tıek etti. Muǵalimderdiń aılyǵy biliktiliginiń artýyna baılanysty 30-dan 50 paıyzǵa kóbeıetini aıtyldy», - deıdi ol.

Sarapshynyń pikirinshe, áleýmettik salada tsıfrlyq tehnologııalardy damytýdyń mańyzy zor.

«Áleýmettenýshi retinde Memleket basshysynyń adamı kapıtalǵa, jastarǵa qoldaý bildirýge kóp kóńil bólip otyrǵany qýantady. Sebebi, bilim baǵdarlamasy eń aldymen urpaqtyń qamy úshin jasalyp jatqan sharýa. Bul logıkalyq turǵydan naqty júıelengen memlekettik saıasat jahandaný dáýirinde adamnyń qabiletin ushtaı túseri sózsiz. Memleket basshysynyń saıasaty qazirgi qazaqstandyq turǵyndardy eńbek naryǵynda suranysqa ıe bola alatyndaı, joǵary aılyqpen, óz otbasyn qamtı alatyndaı jaǵdaıǵa baǵyttalyp otyr», - dep túıdi Lázzat Nurqatova.