QSZI: Qazaqstandy Reseı men batystyń arasyndaǵy ekonomıkalyq qaqtyǵystarǵa tartý - birden-bir qaýip
ASTANA. QazAqparat - Qazaqstandy Reseı men batystyń arasyndaǵy ekonomıkalyq qaqtyǵystarǵa tartý birden-bir qaýip bolyp tabylady. Búgin Ortalyq kommýnıkatsııalar qyzmetine ótken brıfıngte Qazaqstannyń strategııalyq zertteýler ınstıtýty dırektorynyń birinshi orynbasary Leıla Muzaparova osylaı málim etti.
Onyń aıtýynsha, Qazaqstannyń strategııalyq zertteýler ınstıtýty Ýkraına daǵdarysy sheńberindegi Reseıge jasalyp jatqan sanktsııalardyń saldaryn, onyń ishinde Qazaqstan ekonomıkasyna yqtımal áserin zerttep, birqatar qorytyndyǵa kelip otyr.
«Mundaı yqtımal áserlerdi eki baǵytta qarastyrýǵa bolady. Birinshiden, Reseı men batystyń arasyndaǵy baılanystyń nasharlaýy Qazaqstan ekonomıkasyna Eýrazııalyq ekonomıkalyq odaq aıasynda áser etýi yqtımal. Bul rette Reseıdiń jaýap retindegi sanktsııa salatyn elderimen taýar aınalymy aıtarlyqtaı qysqaratyny belgili. Árıne, Reseı batys sanktsııalaryna «jaýap» qatsa, ondaı «jaýaptarynyń» geografııasy da keńeıe tússe, sosyn Eýrazııalyq ekonomıkalyq odaq múshelerinen mundaı qadamdy qoldaý suralsa, osynyń ózi Qazaqstannyń múddesine qaıshy kelýi de múmkin. Sondyqtan da, bundaı stsenarıı negizinde Qazaqstandy Reseı men batystyń arasyndaǵy ekonomıkalyq qaqtyǵystarǵa tartý birden-bir qaýip bolyp tabylady», - dedi L. Muzaparova.
Onyń sózine qaraǵanda, Reseı men batystyń ózara ekonomıkalyq qaqtyǵysynyń basqa baǵyttarynda Qazaqstan ekonomıkasyna áseri bolǵanymen, aıtarlyqtaı qaýip kútilmeıdi. Al Reseı men batystyń arasyndaǵy qarama qaıshy sanktsııalardyń ýshyǵýy, sonyń saldarynyń álemdik ekonomıka arqyly Qazaqstanǵa áseri eń birinshi kezekte álemdik qarjy naryǵyndaǵy segmentter aıasynda baıqalýy múmkin.
«Óıtkeni, qazirgideı sanktsııalar almasý búkil álemdik ekonomıkanyń tejelýine áser etpeı qoımaıdy. Sonyń ishinde sanktsııalar nátıjesinde aǵymdaǵy jyly Reseı ekonomıkasynda stagnatsııa (turalaý) jalǵasatyny, al eýropalyq ekonomıkanyń shyǵyny 2 jylda 100 mlrd dollar shamasynda nemese Eýropa ekonomıkasynyń ІJÓ-degi 0,3 paıyzyna teń bolatyny boljanyp júr. Bul az kórsetkish emes. Mundaı baǵalaýǵa súıensek, eki taraptyń qarama qaıshy sanktsııalary saldarynan álemdik ekonomıka shamamen 0,1 paıyzǵa jýyq shyǵynǵa ushyraıtyny boljanady», - dedi L. Muzaparova.
