QSZI Qazaqstandaǵy prezıdenttik saılaý jóninde saraptamalyq baıandama daıyndady
ASTANA. QazAqparat - Qazaqstannyń strategııalyq zertteýler ınstıtýty sarapshylar tobymen birge Qazaqstandaǵy prezıdenttik saılaý jóninde «Prezıdenttik saılaý-2015: qorytyndylar jáne bolashaq áleýet» atty saraptamalyq baıandamany jasap shyǵardy.
QSZI dırektory Erlan Qarınniń aıtýynsha, baıandama 2015 jyldaǵy kezekten tys prezıdenttik saılaýdyń barlyq aspektisin qamtyǵan keshendi aqparattyq, saraptamalyq ónim bolyp tabylady.
«Biz búgin sizderdiń nazarlaryńyzǵa aldyn ala esepti usynyp otyrmyz, sebebi birqatar materıaldar áli egjeı-tegjeıli taldanyp jatyr. Erteń nemese arǵykúni biz bul jumysty tolyq aıaqtaımyz. Biraq qazirden bastap, aldyn ala nátıjeler týraly aıtýǵa bolady», - dedi E. Qarın búgin qujattyń tanystyrylymynda.
Onyń atap kórsetkenindeı, bul baıandamada saılaýdan keıingi kezeń týraly, osy saılaýdyń Qazaqstannyń damý jolyndaǵy mán-maǵynasy qarastyrylǵan.
«Bir sózben aıtqanda, bizdiń sarapshylar men zertteýshiler saılaý naýqanynyń barlyq protsedýralary men aspektilerin qamtydy. Baıandamanyń basymdyǵy sol, onda keshegi ótken prezıdenttik saılaýǵa qatysty sholýmen qatar, onyń bunyń aldynda ótken saılaýlardan ereksheligi jóninde salystyrlmaly taldaý jasaldy. Sondaı-aq osy jolǵy jáne onyń aldynda ótken saılaýlardaǵy saıası partııalardyń belsendiligine de nazar aýdardyq», - dedi ol.
Bul - QSZI men sheteldik jáne otandyq sarapshylarmen jasalǵan alǵashqy tájirıbe. Jumys tobynyń quramyna QSZI sarapshylary - ıÝrıı Býlýktaev pen Mádına Nurǵalıeva, sonymen birge ınstıtýttyń táýelsiz sholýshysy Marat Shıbutov kirdi.
«Baıandama kólemi nebári 100 bet. Ol óte yqsham. Onyń oqyp shyǵý qıynǵa soqpaıdy», - deıdi joba bastamashysy Marat Shıbutov.
Onyń sózine qaraǵanda, bul qazaqstandyq sarapshylar jasaǵan QR prezıdentin saılaýǵa qatysty alǵashqy baıandamasy.
«Biz munda boljamdar usynyp, saılaýǵa anyqtama beremiz. Alda ne bolatynyn da qamtyp otyrmyz. Prezıdenttik saılaý jóninde bul alǵashqy saraptama. Onyń aldynda halyqaralyq baıqaýshylar nemese ózge de sarapshylar jasap keldi. Endi mine, 1991 jyldan beri Qazaqstan Prezıdentin saılaý naýqanyn tolyq qamtyǵan qoǵamdyq taldamaly baıandama shyqty», - dedi ol.
