QSZI dırektory alǵashqy teledebattarǵa baǵa berdi
ASTANA. KAZINFORM — Qazaqstan Respýblıkasy Prezıdenti janyndaǵy Qazaqstannyń strategııalyq zertteýler ınstıtýtynyń (QSZI) dırektory Jandos Shaımardanov ulttyq telearnada ótken alǵashqy televızııalyq debattarǵa oń baǵa berdi.
— Keshe barlyǵymyz ulttyq telearnanyń tikeleı efırinde ótken alǵashqy televızııalyq debattardyń kýási boldyq. Men muny ashyqtyqtyń, jarııalylyqtyń jáne jalpy Quryltaıdaǵy oryndar úshin júrip jatqan ashyq ári básekeli saılaý naýqanynyń belgisi dep sanaımyn, — dedi Jandos Shaımardanov.
Sondaı-aq QSZI dırektory alǵashqy teledebattardyń kórermen nazaryn aýdarǵanyn atap ótti.
— Mazmundy bóliginen bólek, vızýaldy bezendirilýi de joǵary deńgeıde boldy. Menińshe, bul da aýdıtorııa men Qazaqstan azamattarynyń nazaryn aýdarýǵa yqpal etedi, — dedi Jandos Shaımardanov.
Eske salaıyq, búgin Qazaqstannyń strategııalyq zertteýler ınstıtýty (QSZI) alańynda saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylanyp jatyr.
